İncəsənət

Ana səhifə

İncəsənət

Gələn ilin martında Azərbaycan-italyan musiqisi konserti keçiriləcək

29 dekabr 2011 07:14 (UTC +04:00)

Fidan Hacıyeva italyan prodüserlə işləməyə başlayıb
Bakı-APA. Azərbaycan opera səhnəsinin primadonnası, respublikanın əməkdar artisti, beynəlxalq müsabiqələr laureatı Fidan Hacıyeva gənc və istedadlı İtaliya bəstəkarı, prodüser Françesko Maco ilə əməkdaşlığa başlayıb. APA-nın məlumatına görə, əməkdaşlıq üçün Bakıya gələn Françesko Maco Fidan Hacıyevanın səsini ilk dəfə bu ilin yazında Azərbaycanın İtaliyadakı səfirliyinin Romada təşkil etdiyi konsertdə eşitdiyini deyib: “Səsinə, səhnə mədəniyyətinə, zərifliyinə və cazibədarlığına məftun oldum. Ağlıma birgə əməkdaşlıq ideyası gəldi. Bu ideyanı gerçəkləşdirməkdə mənə həmkarım, eyni vaxtda həm Almaniya, həm də İtaliya konservatoriyalarında təhsil alan gənc Azərbaycan bəstəkarı Günay Mirzəyeva kömək etdi”.
Françesko Maco və Günay Mirzəyeva birgə layihələrini gələn ilin martında Bakıda təqdim etməyi planlaşdırırlar. Layihə barədə məlumat verən Fidan Hacıyeva bildirib ki, bu, Azərbaycan-italyan musiqisi konserti olacaq. Konsertdə Françesko Maco və Günay Mirzəyevanın məxsusi olaraq Fidan Hacıyeva üçün bəstələdikləri əsərlər səslənəcək. Fidan Hacıyevanın messo-soprano səsi üçün yazılmış musiqi Azərbaycan Teleradiosu xorunun dirijoru Şəhla Ələkbərovanın rəhbərlik etdiyi orkestr və xorun müşayiəti ilə ifa olunacaq.
Yeni layihədən və italiyalı prodüserlə işləməkdən məmnun qaldığını gizlətməyən Fidan Hacıyeva gələcək planları barədə də məlumat verib: “Bunlar Azərbaycan və italyan dillərində yeni mahnılar, yeni klassik musiqi, yeni müasir musiqi olacaq. Çox şadam ki, Françesko ilə işləməyə başlamışam. Mənim italyan prodüserim olacaq. Layihəyə Bakıda start veriləcək. Lakin sonradan İtaliya, Almaniya və İngiltərədə konsertlərlə çıxış edəcəyik”.
Finlandiyada keçirilən “Germi Music Festival”ının direktoru olan Françesko Maco bildirib ki, Azərbaycan musiqisindən təsirlənərək Günay Mirzəyeva ilə birlikdə opera yazmaq qərarına gəlib: Operada əsas partiyanı Fidan Hacıyeva ifa edəcək. Əsərdə ənənəvi Azərbaycan və italyan musiqilərindən istifadə ediləcək. Bir növ Avropa musiqisi ilə Azərbaycan musiqisinin sintezi olacaq. Fidan Hacıyeva və Günay Mirzəyeva ilə birgə yaradıcılıq planlarım var. Avropa Azərbaycan musiqisinin bənzərsizliyindən və zənginliyindən mütləq xəbər tutmalıdır. Mənim Avropa teatrları və konsert salonları ilə sıx əlaqələrim var. Ümumi məqsədimiz mədəniyyətlərimizi birləşdirməkdir. İtaliyanın Azərbaycanla ümumi cəhətləri çoxdur, lakin birgə musiqi layihələri olmayıb”.
Gənc musiqiçilərin planlarına, həmçinin 2012-ci ilin aprelində İtaliyanın Berqamo şəhərindəki Donisetti adına teatrda böyük musiqi festivalı keçirmək daxildir. İtaliyalılar Fidan Hacıyevanı bu şəhərə dəvət ediblər. Burada ona sülhməramlı səfir mükafatı təqdim olunacaq.
Görkəmli alman bəstəkarı Volfqanq Rimin yanında təhsil alan bəstəkar Günay Mirzəyeva deyib ki, italyan həmkarı və gözəl müğənni Fidan Hacıyeva ilə işləmək imkanına görə çox xoşbəxtdir: “Biz gənc bəstəkarlar kimi çox xoşbəxtik ki, bütün Avropada Azərbaycan musiqisini Fidan Hacıyevanın ifasında təbliğ edəcəyik. Ümidvarıq ki, böyük müvəffəqiyyət qazanacağıq”.
Finlandiyanın Turku şəhərində musiqi festivalının direktoru olan Françesko Maco gələn ilin payızında bir sıra konsertlər təşkil etmək, eyni cür konsertləri İtaliyada reallaşdırmaq, habelə Azərbaycan və italyan musiqilərinə həsr olunmuş böyük festival keçirmək niyyətindədir.
İtalyan bəstəkar Azərbaycan musiqisi və muğamının heyranı olduğunu deyib: “Azərbaycan mədəniyyəti möhtəşəmdir. Bura böyük istedadlar torpağıdır. Mən sizin baletinizə tamaşa etdim, artistlərin məharəti, musiqi məni valeh etdi. Sizin torpaq istedadlarla zəngindir. Çox istəyirəm ki, İtaliya və bütün Avropa Azərbaycana daha yaxından bələd olsun”.