İncəsənət

Ana səhifə

İncəsənət

Ramil Qasımov Səid Rüstəmov adına Xalq Çalğı Alətləri Orkestri haqqında kitab yazır

29 dekabr 2011 10:54 (UTC +04:00)

Bakı-APA. Səhnəmizin ən gənc Koroğlusu, istedadlı vokalçı, musiqişünas Ramil Qasımov yeni kitab yazır. Vokalçının APA-ya verdiyi məlumata görə, kitab dahi Üzeyir Hacıbəylinin yaratdığı ilk notlu Xalq çalğı Alətləri Orkestrinin yaranmasının 80 illik yubileyinə həsr olunub. Kitabda AzTV-nin Səid Rüstəmov adına Xalq Çalğı Alətləri Orkestrinin 80 illik yoluna nəzər salınıb.
Səid Rüstəmov adına Xalq Çalğı Alətləri Orkestri 1932-ci il mayında Üzeyir Hacıbəyli tərəfindən yaradılıb. Tərkibi 22 nəfərdən ibarət olan orkestrin dirijoru Ü. Hacıbəyli, dirijor köməkçisi və konsertmeysteri Səid Rüstəmov olub. Bu, notla çalan ilk Azərbaycan Xalq Çalğı Alətləri Orkestri idi. Ü. Hacıbəyli xalq mahnı və rəqslərini bu orkestr üçün işləyib, Qərbi Avropa və rus bəstəkarlarının əsərlərini də orkestrə uyğun şəkildə təfsir edib, “Şur” və “Çahargah” fantaziyalarını bəstələyib.
1935-ci ildən orkestrə dirijorluq S.Rüstəmova həvalə edilib. O, 1974-cü ilə kimi orkestrin bədii rəhbəri və baş dirijoru olub. 1983-cü ildən (bəstəkarın vəfatından sonra) orkestrə Səid Rüstəmovun adı verilib. 1974-cü ildən kollektivin bədii rəhbəri və baş dirijoru xalq artisti, professor Nəriman Əzimovdur.