İncəsənət

Ana səhifə

İncəsənət

2011-ci ildə Azərbaycan ədəbiyyat, mədəniyyət və incəsənətinin itkiləri - SİYAHI

2011-ci ildə Azərbaycan ədəbiyyat, mədəniyyət və incəsənətinin itkiləri - <font color=red>SİYAHI</font>

30 dekabr 2011 10:24 (UTC +04:00)

2011-ci ilin ilk itkisi incəsənət sahəsində baş verib. Azərbaycan Rəssamlar İttifaqının katibi, əməkdar rəssam Ənvər Qarayev yanvarın 29-da vəfat edib. Mərhum uzun müddət bağırsaq xərçəngindən əziyyət çəkib və qəfil ölümünün səbəbi də bununla bağlı olub. Mərhum 62 yaşında dünyasını dəyişib.

İlin növbəti itkisi fevralın 1-də olub. Sevilən müğənni Rüfət Mehdiyev gecə saatlarında beyninə qan sızması nəticəsində vəfat edib. Martın 5-də aktyor Elçin Həmidov evində ölmüş vəziyyətdə tapılıb. Tək yaşayan 52 yaşlı aktyorun ölüm xəbəri gözlənilməz olub.

Aprel ayı bir neçə itki ilə yadda qalıb. Aprelin 14-də musiqiçi-cazmen Emil İbrahimli Berlində xərçəng xəstəliyindən vəfat edib. 37 yaşlı musiqiçinin cənazəsi Berlindən Bakıya gətirilərək Vətəndə dəfn olunub. Aprelin 23-də sabiq millət vəkili, “Bakılı oğlanlar” komandasının kapitanı Anar Məmmədxanov 41 yaşında ürək çatışmazlığından dünyasını dəyişib. Aprelin 24-də xalq şairi Balaş Azəroğlu 90 yaşında vəfat edib.

Bu ilin mayın 12-də isə Dövlət Yuğ Teatrının yaradıcısı, tanınmış rejissor Vaqif İbrahimoğlu 62 yaşında uzun sürən xəstəlikdən sonra dünyasını dəyişib.

İyul ayı Azərbaycan incəsənətinə daha bir itki baş verib. İyulun 23-də xalq artisti Sabir Mirzəyev 68 yaşında vəfat edib.

Oktyabrın 12-də Azərbaycan Rəssamlar İttifaqının üzvü Soltan Qara Türkiyədə yaradıcılıq ezamiyyətində olarkən iş başında vəfat edib. İlin son aylarında da mədəniyyət sahəsi önəmli simalarını itirib. Noyabrın 23-də yazıçı Rafiq Tağı, noyabrın 28-də əməkdar artist, Akademik Milli Dram Teatrının aktrisası Sevil Xəlilova dünyasını dəyişib.

Noyabrın 24-də isə Azərbaycan Dövlət Gənc Tamaşaçılar Teatrının aktyoru Elxan Qurbanov elə səhnədə dünyasını dəyişib. Aktyor 63 yaşında ürək çatışmazlığından vəfat edib.

Dekabrın 14-də Azərbaycan səhnəsinin əvəzolunmaz səsi, görkəmli muğam ifaçısı, xalq artisti Qədir Rüstəmov vəfat edib. Türkiyədə Acıbadem Xəstəxanasında uzun müddət müalicə olunan 76 yaşlı xanəndə sözügedən xəstəxanada dünyasını dəyişib. Xalq artistinin cənazəsi Bakıya gətirilib və Vətəndə torpağa tapşırılıb. İlin son itkisi dekabrın 16-da olub. Həmin gün Azərbaycan tanınmış opera müğənnisi, SSRİ xalq artisti Firəngiz Əhmədova 83 yaşında dünyasını dəyişib.