İncəsənət

Ana səhifə

İncəsənət

İntiqam Hümbətov: “Mədəniyyət və Turizm Nazirliyi teatrlardakı bəzi aktyor və rejissorların narazılığı barədə məlumatlıdır”

18 yanvar 2012 15:38 (UTC +04:00)

Bakı. Ülkər Rəşidqızı-APA. Mədəniyyət və Turizm Nazirliyi son vaxtlar Azərbaycan teatrlarında baş qaldıran narazılıqlar barədə məlumatlıdır və bununla bağlı müvafiq tövsiyələr verib. Bu barədə APA-ya açıqlama verən Mədəniyyət və Turizm Nazirliyinin mətbuat katibi İntiqam Hümbətov deyib ki, Azərbaycan Dövlət Gənc Tamaşaçılar Teatrının kollektivindən nazirliyə heç bir rəsmi müraciət daxil olmayıb: “Yaradıcı kollektivlərdə söz-söhbət, giley ola bilər, rəhbərliklə rejissorlar arasında yaradıcı müstəvidə mübahisələr, problemlər ola bilər, amma bütün bunlar Azərbaycan teatrı üçün ciddi ittiham olmamalıdır. Hər hansı məsələ varsa, dövlətin qərarları var, bu qərarlar müvafiq qaydada icra olunacaq. Biz çalışacağıq ki, hər bir sənət adamının, rejissorun, istedadlı aktyorun haqqı tapdanmasın, Azərbaycan teatrındakı xidmətlərinə xələl gəlməsin”.
İntiqam Hümbətov əlavə edib ki, teatrla bağlı xəbər yazanda ehtiyatlı olmaq lazımdır: “Hörmətli həmkarlardan xahiş edirəm ki, Azərbaycan teatrında hər hansı bir aktyor, rejissorun dilindən “teatr zəifləyib”, “işləmir” və sair kimi ciddi ittihamları yazarkən ehtiyatlı olsunlar. Bizim teatr aləmində son altı ildə baş verən yeniliklər bütün xalqın gözünün qarşısında olub və 6 il bundan öncə desəydik ki, 6 il ərzində Azərbaycanda teatrı sahəsində bu qədər iş görüləcək, bəlkə də bunun özü belə nağıla bənzəyərdi. 2006-cı ildə MDB məkanında ilk dəfə teatr haqqında qanunun qəbulu, teatrların inkişafı ilə bağlı ölkə başçısı tərəfindən xüsusi sərəncamın imzalanması, Azərbaycan teatrlarının çox yüksək səviyyədə bərpa olunub istifadəyə verilməsi, müəyyən islahatlara başlanması, istedadlı rejissorların təcrübəsindən istifadə olunması, “2009-2019-cu illərdə Teatr haqqında Dövlət Proqramı”nın qəbul olunması, yeni tamaşalar, kadrların hazırlığı, xaricdə təhsillərin təşkili, ilk dəfə olaraq keçirilən beynəlxalq festival və konfranslar, çoxsaylı uğurlu qastrollar və sair uğurların qarşısında belə bəsit fikirləri ictimaiyyətə çatdırmaq düzgün deyil. Bu fikirləri oxuyanda elə başa düşülür ki, onlar Azərbaycan teatrını, mədəniyyətini sevməyən, onun inkişafını istəməyən şəxslərdir”.