İncəsənət

Ana səhifə

İncəsənət

Vokalçıların Müslüm Maqomayev adına II Beynəlxalq Müsabiqəsinin vaxtı məlum olub

21 yanvar 2012 16:14 (UTC +04:00)

Bakı. Ülkər Qasımova - APA. Vokalçıların Müslüm Maqomayev adına II Beynəlxalq Müsabiqəsinin keçiriləcəyi vaxt müəyyən olunub.

APA-nın Rusiya mətbuatına istinadən yaydığı xəbərə görə, görkəmli sənətkarın anadan olmasının 70 illiyinə həsr ediləcək müsabiqə 2012-ci il oktyabrın 20-21-də Moskvanın “Krokus City Hall” konsert salonunda baş tutacaq.

Müsabiqənin şərtlərinə görə, bura xüsusi musiqi təhsilinə malik olan 18-35 yaşlarında peşəkar ifaçılar və tələbələr qatıla bilər. İştirakçılar həm klassik, həm də estrada mahnılarından ibarət repertuarı yerinə yetirməlidirlər. Müsabiqənin unikallığı da məhz bundadır. Çünki həm opera, həm də estrada janrında yaxşı çıxış etmək vokalçı üçün çətin tapşırıqdır.

Müsabiqə 2 turda təşkil olunub. İlk tur dünya musiqi xəzinəsinə çevrilən klassik və estrada mahnılarına həsr edilib. 2-ci turda ifaçılar Müslüm Maqomayevin repertuarından ölməz mahnıları səsləndirəcəklər.

Müsabiqənin qalibləri pul mükafatları ilə təltif olunacaq. Müsabiqə Müslüm Maqomayevin mədəni-musiqi irsi fondunun təşkilatçılığı ilə həyata keçirilir. Festivalın münsiflər heyətinə SSRİ xalq artisti, Böyük Teatrın solisti, professor Tamara Sinyavskaya sədrlik edir.

Qeyd edək ki, bu silsilədən ilk festival 2010-cu ildə keçirilib. Burada 6 ölkədən 14 iştirakçı təmsil olunub. Münsiflər heyətinin fəxri kürsüsündə Tamara Sinyavskaya ilə yanaşı, Böyük Teatrın solisti, SSRİ xalq artisti, professor Yelena Obrazçova, Rusiya və Gürcüstanın xalq artisti, bəstəkar və müğənni Tamara Qverdtsiteli, Rusiyanın xalq artisti, professor Yuri Başmet, Rusiyanın xalq artisti, bəstəkar Aleksey Rıbnikov, bəstəkar Mişel Leqran, SSRİ xalq artisti, Bakı Musiqi Akademiyasının rektoru, professor Fərhad Bədəlbəyli əyləşiblər.