İncəsənət

Ana səhifə

İncəsənət

Azərbaycanlı rəssamların əsərləri Moskvada keçirilən beynəlxalq sənət festivalında nümayiş olunub - FOTOSESSİYA

Azərbaycanlı rəssamların əsərləri Moskvada keçirilən beynəlxalq sənət festivalında nümayiş olunub - <font color=red>FOTOSESSİYA</font>

05 iyul 2012 07:17 (UTC +04:00)

Moskva. Fərid Əkbərov – APA. Rusiya paytaxtında “Ənənə və müasirlik” adlı VI Moskva Beynəlxalq Sənət Festivalının açılış mərasimi keçirilib. APA-nın Moskva müxbirinin verdiyi məlumata görə, paytaxtın “Manej” Mərkəzi Sərgi Zalında keçirilən festivalın təşkilatçısı Moskva İctimai Fondu, Rusiya Dövlət Dumasının Mədəniyyət Komitəsi, “World for Cultur and Peace” Beynəlxalq Fondu və Rusiya İncəsənət Akademiyası olub.

Festivalda Azərbaycanı istedadlı gənc rəssamlar Məryəm Ələkbərli və Rəşad Mehdiyev təmsil ediblər. Bundan başqa, festivalda jüri qismində təmsil olunan Rusiya Rəssamlıq Akademiyasının vitse-prezidenti Tahir Salahovun da əsərləri nümayiş olunub.

Təşkilatçılar “Ənənə və müasirlik” festivalının builki ulduzunun gənc azərbaycanlı rəssam Məryəm Ələkbərli olduğunu söyləyiblər. Azərbaycanı təmsil edən digər istedadlı gənc rəssam Rəşad Mehdiyevin də əsərləri tamaşaçıların böyük rəğbətini qazanıb.

“Ənənə və müasirlik” festivalını giriş sözü ilə açan Rusiya prezidentinin beynəlxalq mədəni əməkdaşlıq üzrə xüsusi nümayəndəsi Mixail Şvıdkoy bu günün əlamətdar gün olduğunu söyləyib. Onun sözlərinə görə, dahi rəssam Tahir Salahovun sədrliyi ilə keçirilən festival “Ənənə və müasirlik” adlanır: ”Burada müxtəlif nəsillərin nümayəndələrinin əsərləri nümayiş olunur. Həmin əsərlərdə ənənəçilik və müasirlik özünü təcəssüm etdirir”.

Azərbaycanın Rusiyadakı səfiri Polad Bülbüloğlu açılış mərasimində çıxışında Moskvanın mərkəzində belə bir festivalın keçirilməsinin əlamətdar hadisə olduğunu vurğulayaraq deyib ki, belə layihələr təkcə mədəniyyətlərimizi yaxınlaşdırmır, həm də qarşılıqlı mədəni əlaqələrimizi yüksəldir və inteqrasiya prosesini sürətləndirir: “MDB Dövlətlərarası Humanitar Əməkdaşlıq Fondu belə layihələri hər zaman dəstəkləyir və bundan sonra da dəstəkləyəcək. Mən çox şadam ki, festivalda həm Tahir Salahov kimi dahi rəssamın, həm də gənc rəssam Məryəm Ələkbərlinin əsərləri nümayiş olunur. Bu, müxtəlif mədəniyyətlərin, imzaların və maneraların birgə zənginliyidir”.

Tahir Salahov isə çıxışında festivalda 30 ölkədən çox rəssamın iştirak etdiyini diqqətə çatdırıb: “Çox sevindirici haldır ki, müxtəlif ölkələrdən rəssamlar “Ənənə və müasirlik” festivalında görüşürlər. Festivalda müxtəlif nəsillərin nümayəndələrinin əl işləri nümayiş olunur, hansılar ki, sənətlə yaşayıb, sənətlə nəfəs alırlar”.

Qeyd edək ki, “Ənənə və müasirlik” adlı VI Moskva Beynəlxalq Sənət Festivalı iyulun 8-nə kimi davam edəcək.