İncəsənət

Ana səhifə

İncəsənət

Qəbələ IV Beynəlxalq Musiqi Festivalının rəsmi açılış mərasimi keçirilib

25 iyul 2012 20:50 (UTC +04:00)

Qəbələ. Ülkər Rəşidqızı – APA. Bu gün Qəbələ IV Beynəlxalq Musiqi Festivalının rəsmi açılış mərasimi keçirilib. APA-nın Qəbələyə ezam olunmuş xüsusi müxbirinin məlumatına görə, Heydər Əliyev Fondunun təşkilatçılığı ilə keçirilən festivalın açılış mərasimi “Qafqaz Resorte” otelinin qarşısındakı parkda açıq səma altında baş tutub. Mərasimdə Milli Məclisin deputatı Fəttah Heydərov, festivalın bədii rəhbərlərindən biri, Üzeyir Hacıbəyli adına Bakı Musiqi Akademiyasının rektoru, xalq artisti Fərhad Bədəlbəyli çıxış ediblər. Natiqlər, bu festivalda iştirak etmək üçün dünyanın müxtəlif yerlərindən ölkəmizə gəlmiş bütün qonaqları, istedadlı ifaçıları, musiqiçiləri Heydər Əliyev Fondunun prezidenti, YUNESCO və İSESCO-nun xoşməramlı səfiri, Milli Məclisin deputatı Mehriban Əliyevanın adından salamlayıblar. Fəttah Heydərov qeyd edib ki, Azərbaycan mədəniyyətinin təbliğinə xidmət edən bu festivalın həm də ölkəmizin musiqi ənənələrinin dünyada tanıdılması üçün bir vasitədir. F.Heydərov Qəbələdə keçirilən Beynəlxalq musiqi festivalı artıq gözəl bir ənənəyə çevrildiyini deyib: “Bu festival günləri səhnədə dahi Azərbaycan və dünya bəstəkarlarının əsərləri səsləndirilir. Gənc ifaçılarla yanaşı, dünya şöhrətli musiqiçilər bu səhnəyə çıxırlar. Burada klassik və kamera musiqisi, muğamlarımız ifa olunur. Azərbaycan öz musiqi mədəniyyəti ilə hər zaman fərqlənir və Heydər Əliyev Fondu ölkəmizin musiqi irsinin qorunub saxlanılması və təbliği yolunda bir sıra iri layihələr həyata keçirir”. Fərhad Bədəlbəyli qeyd edib ki, bu festival bütün iştirakçılar, xüsusilə də gənc ifaçılar üçün həddindən artıq önəmlidir.

Çıxışlardan sonra Üzeyir Hacıbəyli adına Azərbaycan Dövlət Simfonik Orkestrinin və Azərbaycan Dövlət Xor Kapellasının çıxışları tədbir iştirakçılarının zövqünü oxşayıb. Konsertin birinci hissəsində Hacıbəylinin “Koroğlu” operasından “Çənlibel” xoru, G.Hendelin “Alliluya”, L.Bethovenin piano, xor və simfonik orkestr üçün fantaziya, ikinci hissədə isə C.Rossininin “Sevilya bərbəri” operasından uvertüra, C.Verdinin “Siciliya axşamı” operasından Yelenanın bolerosu, “Nabukko” operasından xor və “Traviata” operasından Violettanın ariyası və “Riqoletto” operasından Riqolettonun ariyası, V.A.Mosartın “Don Juan” operasından Tserlina və Don Juanın dueti, R.Leonkovallonun “Payatsı” operasından Kanionun ariyası, Ü.Hacıbəylinin “Koroğlu” operasından Həsən xanın ariyası, Q.Qarayevin “Vətənimizdir” və F.Bədəlbəylinin “Azərbaycan” əsərləri səsləndirilib. Xalq artisti Rauf Abdullayevin, Azərbaycan Dövlət Xor Kapellasının bədii rəhbəri və baş dirijoru, xalq artisti, Ü.Hacıbəyli adına Bakı Musiqi Akademiyasının kafedra müdiri professor Gülbacı İmanovanın və Bakı Musiqi Akademiyasının professoru, əməkdar incəsənət xadimi Azad Əliyevin dirijorluğu ilə baş tutan konsertlərdə məşhur vokalçılar- Azərbaycan Dövlət Filarmoniyasının direktoru, xalq artisti Murad Adıgözəlzadənin, Azərbaycan Dövlət Akademik Opera və Balet Teatrının solisti, xalq artisti Əvəz Abdullayevin (bariton), Opera və Balet Teatrının və Ş.Məmmədova adına Opera Studiyasının solisti Səbinə Əsədovanın (messo-soprano), Dövlət Akademik Opera və Balet Teatrının solisti, Bakı Musiqi Akademiyasının dosenti, əməkdar artist, Prezident təqaüdçüsü Gülnaz İsmayılovanın (soprano), Azərbaycan Dövlət Opera və Balet Teatrının solisti Fəridə Məmmədovanın (soprano), İtaliyanın Pezaro Musiqi Akademiyasının tələbəsi Azər Rzazadənin (tenor) çıxışı mərasimə toplaşmış tamaşaçılara təqdim edilib.