İncəsənət

Ana səhifə

İncəsənət

Azərbaycanda dünyanın aparıcı hərrac evi “Christie’s”in ilk sərgisi keçiriləcək

12 sentyabr 2012 07:13 (UTC +04:00)

Bakı. Ülkər Rəşidqızı – APA. 15-16 sentyabr tarixlərində dünyanın aparıcı hərrac evi “Christie’s” Azərbaycanda ilk sərgisini təşkil edəcək. Sərgi Heydər Əliyev Fondu və “Yarat!” Müasir İncəsənət Məkanı ilə birgə yenicə istifadəyə verilmiş “The Four Seasons Hotel”də baş tutacaq. “Yarat!” Müasir İncəsənət Məkanından APA-ya verilən məlumata görə, sərgi Heydər Əliyev Fondunun təşkilati dəstəyi sayəsində baş tutacaq. Dünyanın aparıcı incəsənət-biznes təşkilatı olan ”Christie’s” qeyri-adi incəsənət, ehtiras, misilsiz xidmət və təcrübənin canlandığı ad və yerdir. 1766-ci ildə James Christie tərəfindən əsası qoyulmuş “Christie’s” 18-ci əsrdən bəri ən böyük hərracları keçirib və hazırda 32 ölkədə 53 ofisi və illik 450 satışın keçirildiyi 10 satış salonu var. 2011-ci ildə Aida Mahmudova tərəfindən təsis edilmiş “Yarat!” təşkilatı müasir Azərbaycan incəsənətinin ölkə və dünya səviyyəsində təmsil etmək məqsədi daşıyan qeyri-kommersiya təşkilatıdır. Təşkilatın əsas məqsədi həm Azərbaycanda, həm də xaricdə qeyri-kommersiya xarakterli incəsənət fondları ilə dialoq və mubadilə aparmaqdır.

Sərgidə “Christie’s”in London, Nyu-York və Dubayda keçirdiyi payız satışlarında iştirak üçün seçilmiş olan müxtəlif sənət əşyaları və eksponatlar nümayiş etdiriləcək. Həmin əsərlərə impressionist, İkinci Dünya müharibəsindən sonrakı və müasir rəssamlıq əsərləri, şərq xalçaları, eləcə də muasir Ərəb, İran və Türk sənət nümunələri daxildir. Sərgi ilə yanaşı “Yarat!” müzakirələr, nahar ziyafətləri, “Yarat!” Müasir İncəsənət salonuna və Bakıdakı incəsənət studiyalarına ekskursiyalar da təşkil edir. “Yarat!”ın təsisçisi “Christie’s”in sədri Viscount Linley ilə birlikdə sərginin açılışına ev sahibliyi edəcək.

Viscount Linleyin Azərbaycanda təşkil olunacaq sərgini şərh edərkən deyib: ”"Christie’s" Azərbaycanda ilk baxış sərgisini keçirməklə bağlı ona edilmiş müraciətdən məmnundur və bu tədbirə görə verdikləri dəstək üçün “Yarat!” təşkilatına və Heydər Əliyev Fonduna minnətdarlığımızı bildiririk! Müasir incəsənət sərgisi Azərbaycanda incəsənətə verilən böyük qiymətdir. Biz sentyabrda Bakıda beynəlxalq incəsənət sərgisini təşkil etməkdən və gələn il “Christie’s”in Londonda keçiriləcək beynəlxalq sərgisində müasir Azərbaycan incəsənət əsərlərini nümayiş etdirməkdən məmnunluq hissi duyuruq”.

Bakı sərgisindən sonra 2013-cü ildə “Christie’s”in Londondakı sərgi salonunda müasir Azərbaycan incəsənət əsərləri nümayiş etdiriləcək. Sərgidə tanınmış rəssamların, eləcə də “Yarat!” təşkilatının aşkara çıxardığı incəsənət əsərləri nümayiş olunacaq. Bu, Azərbaycan rəssamlarının dünya miqyasında, digər rəssamlarla dialoq yaratmasına köməklik göstərmək məqsədi ilə A.Mahmudovanın davam etdirdiyi işlərin bir hissəsidir.

A.Mahmudova iki günlük sərgi haqqında bunları deyib: “Sərgi Heydər Əliyev adına Fondun dəstəyi ilə baş tutdu. "Buna görə fondun prezidenti Mehriban xanım Əliyevaya, həmçinin fondun bütün işçilərinə öz dərin minnətdarlığımızı bildiririk. “Biz bu tədbiri “Christie’s” ilə birlikdə təşkil etdiyimizə görə qürur duyuruq. Mənim fikrimcə, bu tədbir Azərbaycanın beynəlxalq incəsənət bazarında təmsil olunması baxımından mühüm səhifə açır. Azərbaycan xalqı zəngin mədəni irsə, həmçinin incəsənət əsərlərinə malikdir və biz bu reallığı təbliğ etmək niyyətindəyik. Buna görə sözü gedən tədbirin təşkilində səy və köməkliyini əsirgəməyən “Christie’s” şirkətinə olduqca minnətdarıq. “Yarat!” təşkilatının təsisçisi kimi, bizim müasir incəsənət xadimləri ilə dünya incəsənət xadimləri arasında dialoqa töhfə verəcək mümkün qədər çox mədəniyyətlər arası əlaqələr qurmaq vacibdir".

“Christie’s” _ sərgi