İncəsənət

Ana səhifə

İncəsənət

“Start” Tələbə və Gənclərin Beynəlxalq Film Festivalına filmlərin qəbulu başlayıb

22 sentyabr 2012 09:09 (UTC +04:00)

Festivalda 25-ə qədər ölkənin iştirakı gözlənilir

Bakı. Ülkər Rəşidqızı-APA. Bakıda “Start” Tələbə və Gənclərin Beynəlxalq Film Festivalı keçiriləcək. Festival Gənclər və İdman Nazirliyinin və “Cinema” Gənc Kinematoqrafçılar Mərkəzinin təşkilatçılığı ilə 27, 28 və 29 noyabr tarixlərində baş tutacaq.

Festivalın direktoru Fehruz Şamıyev APA-ya bildirib ki, artıq bu gündən başlayaraq, festivala filmlər qəbul olunur. Onun sözlərinə görə, bu dəfə festival daha böyük miqyasda keçiriləcək: “Bu il “START” Tələbə və Gənclərin Beynəlxalq Film Festivalı əvvəlki illərdən fərqli bir görünüşdə olacaq. Belə ki, Gənclər və İdman Nazirliyinin dəstəyi ilə festivalı daha geniş miqyasda keçirəcəyik. Bu ilki festivalda Avropa və Asiyadan olan 25-ə qədər ölkənin iştirakı gözlənilir. Artıq həmin ölkələrin gənc kinematoqrafçılarının rejissorları ilə əlaqələr qurulub. “START” Qafqaz regionunda ən böyük qısa film festivalıdır. Məlumdur ki, bizim festivala hətta Kann Film Festivalının qısametraj proqramında iştirak etmiş filmlər də qatılıb. Almaniya, Fransa, İspaniya, Portuqaliya, Polşa və s. Avropa ölkələrindən hər il bizim festivala filmlər göndərilir. Bu il festivalda təkcə gənc kinematoqrafçılar üçün yox, orta yaşlı kinematoqrafçılar üçün də maraqlı proqram gözlənilir. Əlavə edim ki, festivalın münsiflər heyətində Avropanın tanınmış festivallarında mükafat almış şəxslər yer alacaq”.

O həmçinin bildirib ki, festivalda daha bir yenilik yerli və beynəlxalq yarışma proqramlarının olmasıdır: “Belə ki, azərbaycanlı müəlliflər filmlərinin səviyyəsini nəzərə alıb işlərini festivalın “Yerli filmlər” müsabiqə proqramına da göndərə bilər. Bu proqramda filmlər 3 nəfərdən ibarət yerli münsiflər heyəti tərəfindən qiymətləndiriləcək. Beynəlxalq müsabiqədə isə filmləri 5 nəfərdən ibarət beynəlxalq jüri heyəti nominasiyalara uyğun mükafatlandıracaq”.

Qeyd edək ki, filmlər 20 oktyabr tarixinə kimi qəbul edilir. Festivalda tələbələr və yaşı 35-ə qədər olan gənc rejissorlar iştirak edə bilər. Müəlliflərin ekran əsərləri “Ən yaxşı bədii film”, “Ən yaxşı sənədli film”, “Ən yaxşı cizgi filmi”, “Ən yaxşı eksperimental film” və “Ən yaxşı film- Qran Pri” uğrunda yarışacaq.