İncəsənət

İncəsənət

Əvəz Abdullayev Lion Opera və Balet Teatrının səhnəsində çıxış edib

31 oktyabr 2012 15:05 (UTC +04:00)

Bakı. Ülkər Rəşidqızı – APA. Azərbaycan Opera və Balet Teatrının solisti, xalq artisti Əvəz Abdullayev Lion Opera Teatrında triumfal çıxış edib.
Teatrın mətbuat xidmətindən APA-ya verilən məlumata görə, sözügedən teatr kollektivi C.Verdinin “Makbet” operasının premyera tamaşasında iştirak etməyi təklif edib. Ona Makbet rolu ifa etmək tapşırılıb. Oktyabrın 13-də Lion Milli Opera və Balet Teatrında tamaşanın premyerası baş tutub və Əvəz bu tamaşada çox böyük uğurla çıxış edib. Ə.Abdullayevlə birlikdə tamaşasında dünya şöhrətli vokalçılar – italiyalı Yano Tamar (Ledi Makbet) və Rikardo Dzanelato (Banko), almaniyalı Dmitro Panov (Makduf) çıxış ediblər. Tamaşanı Yaponiyadan olan dirijor Kazuşi Ono idarə edib, quruluşçu rejissor isə dünya şöhrətli opera rejissoru İvo van Xove (Belçika) olub. Tamaşa səkkiz dəfə göstərilib və hər dəfə böyük uğur qazanıb. Ə.Abdullayev bütün tamaşalarda Makbet rolunu ifa edib.
Fransa mətbuatı və teatr tənqidçiləri tamaşanın yüksək uğurunu qeyd edib. Jurnalistlər qarşısında çıxış edən tamaşanın quruluşçu rejissoru İvo van Xove deyib: “Makbet opera sənətində vokal nöqteyi-nəzərindən çox mürəkkəb bir partiyadır. Əvəz Abdullayevin bu rolu parlaq şəkildə ifa etməsi onun böyük vokal və aktyorluq bacarığına malik olduğunu sübut edir”.

Qeyd olunub ki, Əvəz Abdullayev artıq Qrand opera (Paris) və həmçinin Almaniyanın Ştutqart və Berlin şəhərlərindəki opera teatrlarında çıxış etmək üçün də dəvət alıb.

Lion Milli Opera və Balet Teatrı (Fransa) dünyanın ən qədim və qabaqcıl teatrlarından biridir. Müxtəlif dövrlərdə bu teatrın səhnəsində Enriko Karuzo, Mario Lants, Mariya Kallas, Luçano Pavarotti, Montserrat Kabalye, Plasido Dominqo, Xose Kareras kimi dünya şöhrətli vokalçılar çıxış ediblər.

Əvəz Abdullayev