İncəsənət

Ana səhifə

İncəsənət

Rəssamlar İttifaqı tenderin başa çatacağını, Bəstəkarlar İttifaqı yeni binaya köçəcəyini, Yazıçılar Birliyi isə əsaslı təmirə başlanacağını gözləyir

22 avqust 2007 14:01 (UTC +04:00)

Azərbaycan prezidentinin yaradıcı təşkilatların şəraitinin yaxşılaşdırılması ilə bağlı imzaladığı sərəncamına əsasən, Azərbaycan Rəssamlar İttifaqının binasının təmiri üçün elan olunmuş tender avqustun sonunda başa çatacaq. Bunu APA-ya açıqlamasında Rəssamlar İttifaqının sədri, xalq rəssamı Fərhad Xəlilov bildirib. F. Xəlilovun sözlərinə görə, binanın əsaslı təmir üçün layihə hazırlanır: “Tender yekunlaşdıqdan sonra smeta dəyəri müəyyənləşdirilməlidir. Konkret müddət demək qeyri-mümkündür”.
Hazırda Səadət Sarayının binasında fəaliyyət göstərən Azərbaycan Bəstəkarlar İttifaqının yeni binasının tikilməsi üçün hələ də məkan müəyyənləşdirilməyib. Bəstəkarlar İttifaqının sədri, xalq artisti Firəngiz Əlizadə APA-ya açıqlamasında yer məsələsinin yaxın zamanda həll olunacağına inandığını bildirib: “Biz gözləyirik ki, yeni yerimiz hara olacaq. Çox böyük ümidlər bəsləyirik. İnanırıq ki, bundan yaxşı olacaq”.
Azərbaycan Yazıçılar Birliyinin mətbuat xidmətinin rəhbəri Ədalət Əsgəroğlu isə APA-ya bildirib ki, Yazıçılar Birliyinin binasının əsaslı təmiri gözlənilsə də, konkret vaxt hələ bilinmir. /APA/