İncəsənət

Ana səhifə

İncəsənət

Hansı sənətçliər oruc tutur?

13 sentyabr 2007 09:22 (UTC +04:00)

Bu gün Müqəddəs Ramazan ayının ilk günüdür. Hər il olduğu kimi, APA yenə də şou-biznes nümayəndələri arasında Ramazan ayında oruc tutub-tutmayacaqları ilə bağlı sorğu keçirib. Apardığımız sorğu zamanı məlum olub ki, ötən ildən fərqli olaraq, bu il sənətçilərimizin əksəriyyəti oruc tutmaq niyyətindədir. Bəzi müğənnilər isə oruc tuta bilmədikləri səbəbindən bir sıra xeyriyyə işləri həyata keçirməyi düşünür. Eyyub Yaqubov, İlqar Muradov, Nisə Qasımova, Brilliant Dadaşova, Azərin və Nazpəri Dostəliyeva hər il olduğu kimi, bu ildə oruc tutmaq niyyətindədirlər. Adlarını sadaladığımız sənətçilər Ramazan ayında bir sıra xeyriyyə işləri də həyata keçirdiklərini bildiriblər.
Bu ildən etibarən bu sıraya müğənni Rəqsanə də qoşulacaq. Belə ki, sənətçi bütün ayı oruc tutmaq və ibadət etmək fikrindədir. Elariz Məmmədoğlu Ramazan ayının Əhya və Qədr gecələrində oruc tutmağı düşünür. Əməkdar artist Aybəniz Haşımova isə səhhətindəki problemlərdən dolayı oruc tutmayacağını bildirib. Ancaq o, bir ay ərzində bir sıra uşaq evlərinə gedəcəyini və iftar süfrəsi açacağını vurğulayıb.
Faiq Ağayev səhhətindəki problemlərlə bağlı artıq neçə illərdir oruc tuta bilmədiyini qeyd edib: “Mən səhhətimlə əlaqədar olaraq oruc tuta bilmirəm. Ancaq anam hər il oruc tutur və ibadət edir. Əminəm ki, onun duaları mənə də yazılır”. Aygün Bəylər isə oruc tutmamağını ay ərzində bir neçə səfərinin olacağı ilə əlaqələndirib. Sənətçi yolda olarkən oruc tutmağı düzgün hesab etmir. İlhamə Quliyeva səhhətindəki problemlərə baxmayaraq, Ramazan ayında əsas günlərini oruc tutacaq. Bütün ayı oruc tuta bilmədiyi üçün təəssüfləndiyini bildirən sənətçi qan təzyiqinin qalxması ilə əlaqədar bunu edə bilmir. Bilal Əliyev isə bütün ayı oruc tutacağını və ibadət edəcəyini deyib.
Aygün Kazımova da ağır iş qrafikinə baxmayaraq, Ramazan ayının əsas günlərində oruc tutacaq. Bununla yanaşı, sənətçi bir ay ərzində iftar süfrəsi təşkil edəcək. Aygünün duet ortağı, meyxanaçı Namiq Qaraçuxurlu bütün ayı oruc tutacaq. Azərbaycan Dövlət Akademik Opera və Balet Teatrının solisti, xalq artisti Mənsum İbrahimov səhhətindəki problemlə əlaqədar oruc tuta bilmir. M. İbrahimov bildirib ki, oruc tutmamasına baxmayaraq, Ramazan ayında iftar süfrəsi təşkil edir. Mətanət İsgəndərli də bütün ayı oruc tutacağını və ibadət edəcəyini bildirib. Bununla yanaşı sənətçi bir ay müddətində bir sıra xeyriyyə layihələri də həyata keçirmək fikrindədir. Sevda və Elmira Ələkbərzadə bacıları isə bütün ayı oruc tuta bilməyəcəklər. Bacılar ay ərzində bir sıra xeyriyyə layihələri həyata keçirmək niyyətindədirlər. Sənətçi Xuraman Şuşalı da Ramazan ayının əsas günlərində oruc tutacağını qeyd edib. /APA/