İncəsənət

Ana səhifə

İncəsənət

Azərbaycan kulinarları Gürcüstanda keçiriləcək beynəlxalq kulinariya festivalında iştirak edəcək

03 oktyabr 2007 11:55 (UTC +04:00)

Azərbaycan kulinarları oktyabrın 24-dən 30-na kimi Gürcüstanda keçiriləcək beynəlxalq kulinariya festivalında iştirak edəcək. Bu barədə APA-ya Milli Kulinariya Mərkəzinin direktoru Tahir Əmiraslanov məlumat verib. Bu festivalda Tahir Əmiraslanov münsiflər heyətinin sədridir. Bununla yanaşı, cari ilin oktyabrın 20-də kulinarlarımız 4 ildir dünyada qeyd olunan Beynəlxalq Kulinariya Gününü qeyd edəcək. Tədbir Muğam Teatrında keçiriləcək. T. Əmiraslanov bildirib ki, tədbirdə Kulinariya Mərkəzinin fəaliyyətinin dayandırılması ilə bağlı yayılan xəbərlərə də aydınlıq gətiriləcək: “Düzdür, bizim yerimiz yoxdur. Bütün materiallarımız zirzəmidədir. Bir müddət də orada qalsa, əlimizdə heç bir material qalamayacaq, hamısı çürüyüb gedəcək”. T. Əmriaslanovun sözlərinə görə, Kulinariya Mərkəzinə yer verilməsi ilə bağlı Mədəniyyət və Turizm Nazirliyi Nazirlər Kabinetinə müraciət edib. Mərkəz rəhbəri Bakıda bu zamana kimi Kulinariya Olimpiadasının keçirilməməsinin təqdirəlayiq hal olmadığını bildirib: “1999-cu ildə mərhum prezident Heydər Əliyev Gənclər Dövlət Proqramında Bakıda kulinariya olimpiadalarının keçirilməsinə göstəriş verib. Ancaq 8 il keçməsinə baxmayaraq, bu sahədə heç bir addım atılmayıb. Bununla bağlı müvafiq orqanlara göndərdiyim müraciətlərdən toplu nəşr etmək olar”. T. Əmiraslanov bu planın həyata keçməsində əsas işin Maliyyə Nazirliyinin öhdəsinə düşdüyünü qeyd edib. /APA/