İncəsənət

Ana səhifə

İncəsənət

“Yaddan çıxmaz Qarabağ” adlı mədəni-siyasi aksiya keçiriləcək

22 oktyabr 2007 11:22 (UTC +04:00)

Oktyabrın 24-dən 30-na kimi Mədəniyyət və Turizm Nazirliyinin təşkilatçılığı ilə “Yaddan çıxmaz Qarabağ” adlı mədəni-siyasi aksiya keçiriləcək. Mədəniyyət və Turizm Nazirliyinin mətbuat katibi İntiqam Hümbətov APA-ya bildirib ki, aksiya Gəncə, Lənkəran, Ağdam, Qazax, Füzuli, Sumqayıt və Bakıda keçiriləcək. Oktyabrın 24-də “Yaddan çıxmaz Qarabağ” mövzusunda kitab sərgisi təşkil ediləcək. Sərgidə respublikanın müxtəlif şəhər və rayonlarının kitabxanalarından gətirilmiş kitablar nümayiş olunacaq. Aksiyanın davamı olaraq Ağdam Dövlət Dram Teatrında S. Nuru qızının “Qisas” dramı, Şuşa Dövlət Musiqili Dram teatrında Elçinin “Şuşa dağlarını duman bürüyüb” tamaşası, Bakı Bələdiyyə Teatrının kollektivinin ifasında A. Qurbaninin “Türk sancağı” və Ə.Əliyevin “Unutqanlıq qorxunc bəladır” tamaşaları, Lənkəran Dövlət Teatrında H. Mirələmovun “Vicdanın hökmü” tamaşası, Azərbaycan Dövlət Akademik Milli Dram teatrının səhnəsində H. Mirələmovun “Xəcalət” dramı, Gəncə Dövlət Dram Teatrında N. Cəfərovun “Buna da şükür” dramı, Bakı Uşaq Teatrının ifasında A. Soltanın “Şapalaqsız gün” tamaşası, Sumqayıt Dövlət Musiqili Dram Teatrı Ə. Lələdağın “Dağlarda tufan” dramı, Qazax Dövlət Dram Teatrında Əli Əhmədovun “Zamanın faciəsi” - ədəbi-bədii kompozisiyası, Azərbaycan Dövlət Akademik Milli Dram Teatrında İylas Əfəndiyevin “Xurşidbanu Natəvan” dramı, Azərbaycan Dövlət Akademik Opera və Balet Teatrı Vasif Adıgözəlovun “Natəvan” operası nümayiş etdiriləcək. “Yaddan çıxmaz Qarabağ” adlı mədəni-siyasi aksiya çərçivəsində “Nizami”, “Araz”, “Vətən”, “Dostluq” kinoteatrları “Fəryad”, “Arxada qalmış gələcək”, “Günəş və bulud”, “Ağ atlı oğlan”, “Girov” bədii filmlərinin və “Haray”, “9 dəqiqə” sənədli filmlərinin nümayişi nəzərdə tutulub. Bu silsilədən keçirilən bütün tədbirlərə giriş pulsuzdur. /APA/