İncəsənət

Ana səhifə

İncəsənət

Azərbaycanda “Dünya Mədəniyyəti Gözəli” yarışması keçiriləcək

23 noyabr 2007 14:07 (UTC +04:00)

Azərbaycanda “Dünya Mədəniyyəti Gözəli” yarışması keçiriləcək. APA-nın məlumatına görə, yarışma bu zamana kimi 10-dan artıq beynəlxalq səviyyəli gözəllik yarışmasının təşkilatçısı olan Türkiyənin “Rezonans” şirkətinin təşkilatçılığı ilə həyata keçiriləcək. Tədbirdə çıxış edən “Rezonans” şirkətinin prezidenti Sua Özgərin nümayəndəsi Ayhan İşıqlı bu tədbirin Azərbaycanda keçirilməsinin onların ideyası olduğunu vurğulayıb. Onun sözlərinə görə, layihənin Azərbaycanda təşkilatçısı qismində tanınmış prodüser Tolik iştirak edəcək: “Biz bu layihə ilə bağlı Kamal Cenk İçtenə müraciət etmişdik. Lakin o, bu işi Tolikə həvalə edib. Biz təşkilatçı olaraq Azərbaycanda bu yarışmanın uğurla baş tutacağına inanırıq. “Dünya Mədəniyyət Gözəli” yarışması ilk dəfə olaraq 1996-cı ilin iyul ayında Başkənddə keçirilib. Müsabiqə əsasən dünyanın müxtəlif ölkələrinin mədəniyyətləri ilə tanış olmaq və adət-ənənələri bərpa etmək məqsədi daşıyır. Azərbaycan bu müsabiqədə ilk dəfə iştirak edəcək. Ermənistan bu yarışmada iştirak etmək istəsə də, onlara lisenziya verməmişik. Çünki hesab edirik ki, bu önəmli yarışmada onların yeri yoxdur”.
Tədbirdə çıxış edən Kamal Cenk İçten müsabiqənin Azərbaycan üçün çox önəmli olduğunu qeyd edib: “Bu yarışma nə “Best Model”, nə də digər yarışmaların təkrarı deyil. Bu yarışma tam milli şəkildə həyata keçiriləcək və burada iştirak edəcək gözəllər açıq-saçıq geyimlərdə səhnəyə çıxmayacaqlar. Bu yarışmada çimərlik geyimlərində səhnəyə çıxmaq etapı da olmayacaq. Yarışmanın qalibi isə öz ölkəsinin milli geyimini, adət-ənənəsini və tarixini bilən iştirakçı seçiləcək”. Layihənin Azərbaycandakı təşkilatçısı Tolik yarışmanın final gecəsinin məhz Azərbaycanda keçiriləcəyini vurğulayıb: “Biz yarışmaya iştirakçıların qatılması üçün efir reklamına dekabrın 15-də başlayacağıq. Yanvarın 3-də isə bütün reklamlara son qoyulacaq. Yarışmada iştirak etmək istəyi olan qızlar arasından 16 nəfər seçilib müsabiqəyə vəsiqə qazanacaq. 16 iştirakçının ailəsi ilə müqavilə bağlanacaq, çünki həmin qızlar bir ay müddətində oteldə qalacaq və mədəniyyət dərsləri keçəcəklər. Eyni zamanda iştirakçılar Azərbaycanın bölgələrinə gedəcək və tarixi haqqında bilgilər əldə edəcək. Biz hər gün canlı kamera vasitəsi ilə iştirakçılara bağlanacağıq. Müsabiqə həftədə 2 dəfə canlı yayımlanacaq və hər həftə müsabiqəni bir iştirakçı tərk edəcək. Həftənin qalibi SMS-lə seçiləcək. Sonluğa qalan üç iştirakçı arasında isə seçimi münsiflər heyəti edəcək. Müsabiqənin münsiflər heyətində xalq artisti Afaq Məlikova, millət vəkili Lalə Abbasova, əməkdar incəsənət xadimi Fəxriyyə Xələfova və müğənni Röya Ayxan təmsil olunacaq. Qalib digər müsabiqələrdəki kimi pulla yox, tam şəffaf şəkildə seçiləcək. Həm də biz müsabiqə iştirakçılarını satmaqla məşğul olmayacağıq. Biz təmiz iş görəcəyik”.
Yanvarın 29-da İzmirdə keçiriləcək müsabiqənin ilk versiyasında dünyanın 22 ölkəsindən nümayəndə iştirak edəcək: “Yarışmanın final gecəsi isə martda Bakıda Bakı Əyləncə Mərkəzinin böyük zalında təşkil olunacaq və gecə Türkiyə telekanallarından biri vasitəsi ilə dünyanın 112 ölkəsinə yayımlanacaq. Yarışmaya qatılacaq 22 ölkənin nümayəndəsi ikinci turda Azərbaycanın milli geyimlərini nümayiş etdirəcək. Müsabiqədə iştirak edən ölkələrin münsiflər heyətinin üzvlərinin iştirakı ilə seçiləcək qalib bir il ərzində öz ölkəsini beynəlxalq səviyyəli yarışlarda təmsil edəcək və bu müddət ərzində ölkəsinin siması olacaq. Eyni zamanda qalib bahalı avtomobilin sahibi olacaq. Hazırda biz bununla bağlı danışıqlar aparırıq”. Tolik bildirib ki, müsabiqə ilə bağlı noyabrın 30-da yeni mətbuat konfransı keçiriləcək ki, tədbirdə “Rezonans” şirkətinin rəhbəri Sua Özgər, Gönül Yazar və münsiflər heyətinin üzvləri iştirak edəcək. Tolikin sözlərinə görə, müsabiqə iştirakçıları modelyer Fəxriyyə Xələfovanın kolleksiyasını geyinəcək. /APA/