İncəsənət

Ana səhifə

İncəsənət

Əbülfəs Qarayev Mədəniyyət və Turizm Nazirliyinin iki illiyi münasibəti ilə mətbuat konfransı keçirib

30 yanvar 2008 15:37 (UTC +04:00)

“Mədəniyyət və Turizm Nazirliyi iki illik fəaliyyəti dövründə bir çox uğurlar əldə edib. Bu
uğurlar həm mədəniyyət, həm də turizm sahəsində olub”. APA-nın məlumatına görə, bu fikirləri Əbülfəs Qarayev Mədəniyyət və Turizm Nazirliyinin fəaliyyətinin iki illiyi münasibəti ilə keçirdiyi mətbuat konfransında deyib. Nazir bildirib ki, iki il ərzində kitabxana sistemində, muzey işində, tarixi abidələrin saxlanılması, qorunması və turizm sahəsində bir sıra işlər görülüb. Ə. Qarayev ötən il Qobustanın UNESCO-nun mədəni irs siyahısına salınmasını vacib hadisə kimi qeyd edib. Bununla yanaşı nazir, ötən ildən beynəlxalq televiziya kanalları ilə əməkdaşlığın bu gündə davam etdiyini bildirib: “Artıq CNN telekanalında iki reklam çarxımızın nümayişinə başlanılıb. Fevralın ortalarından isə “Eurovnews” kanalında bu çarxlar göstəriləcək. Bu əməkdaşlığın sahəsini biz daha da genişləndirməyi düşünürük”. İki il müddətində teatrlarda 70-dən artıq tamaşaların hazırlandığını vurğulayan Ə.Qarayev, bu sayın daha da artması üçün teatr rəhbərlərinin ciddi iş rejimi ilə fəaliyyət göstərməsini arzulayıb: “Bu ildən etibarən ekranlaşdırılacaq bütün filmlər Ekspert Şurası tərəfindən seçilir. Bu, çox yüksək səviyyəli filmlərin istehsalına yardım göstərən amildir. Iki illik faəlyiyətimiz dövründə bir sıra mədəniyyət ocaqları da əsaslı təmir olunub və müasir standartlarla istifadəyə verilib. Bu gün biz müasir teatrlarda işləyəcək rejissorlar yetişdirmək barədə ciddi düşünməliyik. Rejissorların işinin təkmilləşdirilməsi üçün xüsusi layihələr həyata keçirməyi düşünürük”. Azərbaycanda turizm sahəsində də bir sıra irəliləyişlərinin olduğunu bildirən Ə. Qarayev, 2006-cı illə müqayisədə 2007-ci ildə turistlərinin sayının 11 faiz artdığını qeyd edib: “Turizm sahəsinin inkişafında il yarımdır fəaliyyətə başlayan Turizm İnstutunun da rolu böyükdür. Ötən ilin yekunlarına görə, Turizm İnstitutu tələbə qəbulu üzrə üçüncü yeri qazanıb. Bu, o deməkdir, ki, Azərbaycanda bu sahə daha da inkişaf edəcək”. Bu vaxta kimi 150 mehmanxananın lisenziya aldığını bildirən nazir, lisenziya almayan mehmanxanaların fəaliyyətlərinin dayandırıldığını vurğulayıb: “Bizim qoyduğumuz qaydalara riayət etməyən və lisenziyası olmayan mehmanxanaların hamısının fəaliyyəti artıq dayandırılmağa başlanılıb”. /APA/