Bakı. Etibar Məmmədov – APA. Qeydiyyatı olmayan qeyri-hökumət təşkilatlarının (QHT) ianə və maliyyə mənbəyinin araşdırılmasını nəzərdə tutan qanun layihəsinin Milli Məclisin gündəliyinə salınması ilə bağlı bu gün mətbuat konfransı keçirilib.
APA-nın məlumatına görə, tədbirdə çıxış edən “Hüquq və inkişaf” İctimai Birliyinin rəhbəri Hafiz Həsənov qeydiyyatdan keçməyən QHT-lərin ianə alması, maliyyələşməsini araşdırmaq üçün müzakirəyə çıxarılması təklifini ciddi problem kimi qiymətləndirib.
O, qanun layihəsinin qəbul olunmaması üçün QHT-lər adından parlamentə müraciət ünvanlamağı təklif edib.
Vəkil Əshabəli Mustafayev isə deyib ki, qanun qəbul olunarsa, ilk növbədə qeydiyyatdan keçməyən QHT-lərin fəaliyyətində problem yaranacaq: “Təklif edirəm ki, biz də qanuna dəyişiklik layihəsi hazırlayaraq parlamentə təqdim edək. Layihəyə QHT-lərin qeydiyyatının sadələşdirilməsi, müqavilələrin qeydiyyatının onlayn şəkildə aparılması və başqa məsələlər təklif olunmalıdır”.
Ekspert Ələsgər Məmmədli də qanun layihəsini tənqid edib.
Sonda qanunun qəbul olunmaması üçün QHT-lər adından Milli Məclisə müraciət göndərilməsi qərara alınıb.