İnfrastruktur

Ana səhifə

İnfrastruktur

Azərbaycanın poçt sistemi üç ildən sonra rentabelli olacaq

09 oktyabr 2008 15:40 (UTC +04:00)

Bakı. İlhamə İsabalayeva – APA-Economics. Azərbaycan Rabitə və İnformasiya Texnologiyaları Nazirliyinin (RİTN) «Azərpoçt» Dövlət Müəssisəsi 2010-cu ildən mənfəətini artırmağa başlayacaq.
«APA-Economics»in məlumatına görə, RİTN-in poçt sektorunun müdiri Novruz Məmmədov bildirib ki, 2012-ci ildə artıq «Azərpoçt»un dünyanın inkişaf etmiş ölkələri səviyyəsində yüksək rentabellik qabiliyyətinə malik olacağı gözlənilir. N.Məmmədov deyib ki, universal poçt xidmətlərinin göstərilməsi «Azərpoçt»a zərərlə başa gəlir. Buna görə də 2009-cu ildən bu məqsədlə dövlət büdcəsindən kompensasiya tam şəkildə ödəniləcək. Bu vəsait hesabına da poçt işçilərinin əmək haqqının nisbətən artımı təmin olunacaq.
N.Məmmədovun sözlərinə görə, 2009-cu ildən Ümumdünya Poçt İttifaqının STEFI beynəlxalq pulköçürmə sistemi çərçivəsində təcili elektron pul baratlarının göndərişi mümkün olacaq. Bu göndərişlərin bir neçə, hətta bir saat ərzində ünvana çatdırılması mümkün olacaq.
Gələn ilin birinci yarısından artıq ölkənin bütün ərazisində qeydiyyatlı poçt göndərişlərinin izlənilməsi mümkün olacaq.
Nazirlik rəsmisinin sözlərinə görə, «Azərpoçt»a bank-maliyyə xidmətlərinin göstərməsi üçün Azərbaycan Milli Bankı tərəfindən lisenziya veriləndən sonra bu qurum müstəqil şəkildə bütün beynəlxalq pul köçürülmələri sisteminə qoşula biləcək. Bu isə əhalinin alternativ xidmətlərdən istifadə edə bilməsinə imkan verəcək.