İnfrastruktur

Ana səhifə

İnfrastruktur

Azərbaycanda keçiriləcək beynəlxalq sərgidə 5 ölkənin rabitə naziri iştirak edəcək

04 noyabr 2008 13:47 (UTC +04:00)

Bakı. İlhamə İsabalayeva – APA-Economics. Bu ilin noyabr ayının 11-dən 14-dək Böyük Britaniyanın «ITE Group» sərgi şirkəti və onun Qafqazdakı ekzklüziv tərəfdaşı «İteca Caspian»ın birgə təşkilatçılığı ilə Bakıda keçiriləcək XIV Azərbaycan Beynəlxalq Telekommunikasiya və İnformasiya Texnologiyaları Sərgi-Konfransında («BakuTel-2008») müxtəlif ölkələrin rabitə sahəsi üzrə 64 səlahiyyətli nümayəndəsi iştirak edəcək.
«İteca Caspian»ın Bakıdakı baş ofisindən «APA-Economics»ə verilən məlumata görə, sərgi-konfransda Əfqanıstanın informasiya texnologiyaları və rabitə naziri Əmirzai Sangin (Amirzai Sangin), Türkmənistanın rabitə naziri Rəsulberdı Hocaqurbanov, Moldovanın informasiya inkişafı naziri Pavel Bucitci (Pavel Buceatchi), Türkiyənin nəqliyyat və rabitə naziri Binəli Yıldırım (Binali Yildirim), Tacikistanın rabitə və nəqliyyat naziri Əbdürəhim Aşur (Abdurahim Ashur) və onun müavini Bek Zuxurov (Bek Zukhurov), Qazaxıstanın İnformatizasiya və Rabitə Agentliyinin vitse-prezidenti Əsgər Bişiqayev (Askar Bishigaev), Rusiyanın KİV və rabitə nazirinin müavini Naum Marder (Naum Marder), Gürcüstanın iqtisadi inkişaf nazirinin birinci müavini Vaxtanq Lejava (Vakhtang Lezhava), MDB-nin Regional Rabitə Birliyinin baş direktoru Nurudin Muhitdinov (Nurudin Mukhitdinov), İKT və İnkişaf üzrə Qlobal Alyansın icraçı direktoru Sarbuland Xanın (Sarbuland Khan) iştirakı gözlənilir.
Sərgi iştirakçıları arasında İordaniya Rabitə və İnformasiya Texnologiyaları Nazirliyinin baş katibi Bəşər Bəşairəh (Bashar Bashaireh), Orbital Elmi Korporasiyanın sədri David Tompson (David Thompson), eyni zamanda Sloveniyanın İqtisadi İnkişaf Nazirliyinin, Qazaxıstanın «Kazaktelekom», Gürcüstanın «Caucasus Online», «Georgia Telecom» şirkətlərinin, Estoniya Texnologiyalar Universitetinin nümayəndələri də olacaq.
«İteca Caspian»dan bildirilib ki, sərgidə informasiya texnologiyaları sahəsində fəaliyyət göstərən 140-dan artıq şirkətin iştirak edəcəyi gözlənilir. Tədbir çərçivəsində regional nazirlər görüşü də keçiriləcək. Azərbaycan Rabitə və İnformasiya Texnologiyaları Nazirliyinin təşkil etdiyi bu görüşün mövzusu «Yüksək sürətli TransAvrasiya İnformasiya Magistralı» olacaq.