İnfrastruktur

Ana səhifə

İnfrastruktur

Bakıda Azərbaycan-Estoniya İKT seminarı keçirilib

12 noyabr 2008 12:20 (UTC +04:00)

Bakı. İlhamə İsabalayeva –APA-Economics. Bu gün Bakıda noyabrın 11-dən işə başlayan XIV Azərbaycan Beynəlxalq İnformasiya Texnologiyaları və Telekommunikasiya Sərgisi (BaluTel-2008) çərçivəsində Azərbaycan-Estoniya İKT seminarı keçirilib.
«APA-Economics»in məlumatına görə, seminarın açılış mərasimində çıxış Azərbaycanın rabitə və informasiya texnologiyaları naziri Əli Abbasov iki ölkə arasında rabitə sahəsində əməkdaşlığın inkişaf etdiyini söyləyib. Nazir Azərbaycanın Estoniyadan bu sahə üzrə bəzi təcrübələrinin öyrənilməsinin əhəmiyyətini də qeyd edib.
Estoniya-Azərbaycan Ticarət Palatasının sədri xanım Yana Krimpe isə bildirib ki, Azərbaycan «Elektron Azərbaycan» Dövlət Proqramının I mərhələsini uğurla həyata keçirib. Palata sədrinin sözlərinə görə, Estoniya elektron hökumətin qurulması sahəsində böyük təcrübəyə malikdir. Bu ölkədə artıq elektron səsvermə, elektron səhiyyə, elektron bank, elektron vergi və s. xidmətlər olduqca geniş tətbiq edilir. Bu ölkə artıq dünyada ilk dəfə olaraq, mobil telefonla səsverməni həyata keçirməyə texniki baxımdan hazırdır: «İnternetdə Skype proqramından geniş istifadə edilir. Amma çox az adam bilir ki, bu məhsul Estoniyaya məxsusdur. Skype bütün dünyaya göstərdi ki, böyük resursları olmayan ölkələr yaxşı ideyalar verə bilərlər. Estoniya kiçik ölkə olsa da, İT məhsullarının tətbiq edilməsi üçün səmərəli ölkədir».
Y.Krimpe Azərbaycana elektron hökumətin qurulmasında yardım göstərə biləcəklərini də söyləyib.
Estoniyanın vahid elektron məlumat bazasının yaradılmasını nəzərdə tutan «XRoad» layihəsinin direktoru Aleksandr Reitsakasın sözlərinə görə, ölkə əhalisinin 80%-nin elektron şəxsiyyət vəsiqəsi (idCard) var. Bu sənədlə əhali elektron bank və digər xidmətlərdən istifadə edə bilər. Estoniyada hər polis avtomaşınındakı kompüter İnternetlə təmin edilib. Bununla yanaşı, Estoniyada məktəblərin 65%-i «elektron məktəb» sistemi əsasında işləyir. Bu isə o deməkdir ki, təhsil alanların 95%-i bu sistemdən istifadə edə bilir.
Qeyd edək ki, noyabrın 14-dək davam edəcək XIV Azərbaycan Beynəlxalq İnformasiya Texnologiyaları və Telekommunikasiya Sərgisi «İteca Caspian» şirkəti tərəfindən təşkil olunub.