İnfrastruktur

Ana səhifə

İnfrastruktur

Azərbaycan Dövlət Əmlakının İdarə Edilməsi üzrə Dövlət Komitəsində ötən ilin yekunlarına dair iclas keçirilib

27 yanvar 2009 12:03 (UTC +04:00)

Bakı. Rəşad Süleymanov – APA-Economics. Azərbaycan Dövlət Əmlakının İdarə Edilməsi üzrə Dövlət Komitəsində (DƏİEDK) 2008-ci ilin yekunlarına həsr olunmuş iclas keçirilib. Bu barədə «APA-Economics»ə DƏİEDK-nin mətbuat xidmətindən məlumat verilib.
Müşavirədə çıxış edən komitə sədri Kərəm Həsənov qeyd edib ki, özəlləşdirmənin sürətləndirilməsi və dövlət əmlakının idarə edilməsinin təkmilləşdirilməsi məqsədi ilə 30-dan çox normativ hüquqi sənədin layihəsi hazırlanıb. Özəlləşdirilmiş 50 müəssisə üzrə fərdi dəstəklənmə tədbirləri həyata keçirilib və müxtəlif mövzularda 11 seminar təşkil edilib, 15 özəlləşdirilmiş müəssisənin nümayəndələrinin Latviya və Türkiyəyə səfərləri təşkil olunub.
K.Həsənov bildirib ki, ötən il aparılmış monitorinqlər nəticəsində aşkar edilmiş 290-a yaxın müəssisə və obyektin torpaq sahələrindən qeyri-qanuni istifadə hallarının aradan qaldırılması ilə bağlı işlər görülüb. Həmçinin, 170-ə yaxın müəssisə və səhmdar cəmiyyətlərində dövlət əmlakının mövcudluğu, qorunub saxlanılması və ondan səmərəli istifadə olunması, habelə dövlət büdcəsinə dividendlərin hesablanılması və ödənilməsi vəziyyəti araşdırılıb. Nizamnamə kapitalında dövlət payı olan səhmdar cəmiyyətlərindən 402 balans hesabatı və 470-ə yaxın inventarizasiya aktı qəbul edilib. Komitənin sərəncamında olan dövlət müəssisələrindən isə 202 balans hesabatı və inventarizasiya aktı qəbul olunub. Hesabat müddəti ərzində ümumilikdə dövlət müəssisə və təşkilatlarından komitəyə 5 600-ə yaxın 2-Əmlak nömrəli statistik hesabat göndərilib. Özəlləşdirmədən sonra alqı-satqı müqaviləsinin şərtlərinə əməl olunması və fəaliyyətində öz profilinin saxlanılması ilə bağlı 100-dən çox sosial təyinatlı obyektdə monitorinq aparılıb.
Müşavirədə özəlləşdirmənin daha da sürətləndirilməsi, dövlət əmlakının idarə edilməsinin təkmilləşdirilməsi, dövlət mülkiyyətində olan torpaq sahələrində qeyri-qanuni tikinti quraşdırma işlərinin aparılmasının, onların istifadə təyinatının dəyişdirilməsi hallarının qarşısının alınması və s. bağlı göstərişlər verilib.