İnfrastruktur

Ana səhifə

İnfrastruktur

Bu il ortalarında Azərbaycanda 3G texnologiyası üzrə xidmətlərin tətbiqinə başlanacaq

28 yanvar 2009 13:50 (UTC +04:00)

Bakı. Aynur Vəliyeva – APA-Economics. Azərbaycanın üçüncü mobil rabitə operatoru olan «Azerfon» şirkəti («Nar Mobile» ticarət nişanı) bu ilin ortalarında 3G texnologiyası vasitəsi ilə abunəçilərinə xidmət göstərməyə başlayacaq. Şirkətin baş direktoru Gido Helbixin «APA-Economics»ə verdiyi məlumata görə, hazırda 3G texnologiyası şirkət tərəfindən test rejimində tətbiq olunur.
Qeyd edək ki, bu texnologiya eyni tezlik zonasında daha çox məlumat ötürməyə, daha çox səsli birləşməyə xidmət göstərməyə imkan verir. Nəticədə, operator daha çox abunəçiyə keyfiyyətli xidmət göstərmək imkanına malik olur.
Üçüncü nəsil rabitəsini ikincidən fərqləndirən daha bir mühüm cəhət odur ki, bütün məlumatların (səsli və istənilən digər məlumatların) baza stansiyalarından mobil terminallara ötürülməsi İnternetdə olduğu kimi İP-protokolu üzrə həyata keçirilir. Müvafiq olaraq, birləşmələrin kommutasiyası adi, hətta rəqəmli kommutator tərəfindən deyil, softsviç, yəni müvafiq proqram təminatına malik adi universal server tərəfindən həyata keçirilir.
Azərbaycanın mobil rabitə operatorları artıq bir neçə ildir ki, həmin texnologiyanı tətbiq etmək niyyətində olduqlarını və buna hazır olduqlarını bəyan edir, lakin müvafiq lisenziya və tezliklər olmadığından, eləcə də digər subyektiv və ya obyektiv səbəblərdən ölkədə bu texnologiyanın tətbiqi bu günə kimi yubadılıb. Mobil rabitə bazarının yerli operatorlar tərəfindən nümayiş etdirilən inkişaf sürətini nəzərə alsaq, yaxın 2-3 ildə mobil rabitənin yayılmasının intensiv şəkildə artacağını gözləmək olar. Lakin bununla yanaşı, bütün dünyada olduğu kimi, Azərbaycanda da tariflərin təbii şəkildə azaldılması və həmin bazarın həddindən artıq dolması nəticəsində abunəçilərə xidmət göstərilməsindən əldə edilən gəlirlərin (ARPU) azalacağı proqnozlaşdırılır. Beynəlxalq ekspertlərin fikrincə, yeni texnologiyaların meydana çıxması bu prosesə mane ola bilər ki, onlar mobil rabitə bazarı gəlirlərinin gələcək yüksəlişinə səbəb olacaq. Bu inkişafa üçüncü (3G) və dördüncü nəsil (4G) texnologiyaları kömək edə bilər.
Qeyd edək ki, «Azerfon» MMC-yə ölkədə GSM standartlı mobil rabitə xidmətləri göstərmək üçün Rabitə və İnformasiya Texnologiyaları Nazirliyi tərəfindən 2005-ci ilin dekabrın 30-da lisenziya verilib. Şirkət kommersiya fəaliyyətinə 2007-ci ilin martın 21-də başlayıb. Hazırda şirkətin 1 mln. abunəçisi var.