İnfrastruktur

Ana səhifə

İnfrastruktur

Azərbaycanda «Rieltorların fəaliyyəti haqqında» qanun layihəsi hazırlanır

30 yanvar 2009 14:50 (UTC +04:00)

Bakı. Nicat Mustafayev – APA-Economics. Bakı Rieltorlar Assosiasiyası (BRA) 2009-cu ilin sonunadək «Rieltorların fəaliyyəti haqqında» qanun layihəsini Azərbaycan hökumətinə təqdim edəcək. Bu barədə «APA-Economics»ə BRA-nın prezidenti Vəfadar Axundov məlumat verib.
V.Axundovun sözlərinə görə, hazırda qanun layihəsi Beynəlxalq Maliyyə Korporasiyasının (IFC) dəstəyi ilə işlənib hazırlanır: «Çox güman ki, bu il ərzində qanun layihəsi ölkə hökumətinə təqdim olunacaq».
V.Axundov onu da qeyd edib ki, sözügedən qanun layihəsi qəbul olunarsa, ölkədəki rieltor sahəsi tam qanunlaşdırılacaq və bu sənəd ölkədə, əsasən də Bakı şəhərində fəaliyyət göstərən bəzi fərdi rieltorların fırıldağının qarşısını alacaq: «Biz ölkə sakinlərini elə rieltorlarla əməkdaşlıq etməyə çağırırıq ki, hansıların peşəkarlıqdan əlavə əlində müvafiq sertifikatları da var».
Qeyd edək ki, BRA 2009-cu ilin yanvar ayının əvvəlindən fəaliyyət göstərir. Assosiasiyanın təsisçiləri rolunda «MBA» konsaltinq, «New Europe» və «Bakı Əmlak» daşınmaz əmlak şirkətləri çıxış edir. Hazırda BRA Azərbaycan Sahibkarlar Konfederasiyası və Azərbaycan Qiymətləndiricilər Cəmiyyəti ilə əməkdaşlıq edir.