İnfrastruktur

Ana səhifə

İnfrastruktur

Azərbaycanda «İnnovativ müəllimlər» müsabiqəsində 200-dən artıq müəllim iştirak edir

04 fevral 2009 09:49 (UTC +04:00)

Bakı. Aynur Vəliyeva – APA-Economics. «Microsoft» Korporasiyasının Azərbaycanda Təhsil Nazirliyinin dəstəyi ilə keçirilən «İnnovativ müəllimlər» müsabiqəsində 200-dən artıq müəllim iştirak edir.
«Microsoft Azerbaijan» şirkətinin Təhsildə əməkdaşlıq Proqramı üzrə meneceri, müsabiqənin təşkilat komitəsinin sədri Emin Axundovun «APA-Economics»ə verdiyi məlumata görə, müsabiqənin şərtlərinə uyğun olaraq, müəllimlər «Məzmunda innovasiyalar» və «Tərəfdaşlıqda innovasiyalar» nominasiyaları üzrə http://itn-az.spaces.live.com ünvanında yerləşən saytda öz layihələrinin təsvirlərini təqdim ediblər. Fevralın 2-7-də keçiriləcək seçimdən sonra mütəxəssislər jürisi finala yalnız 20 iştirakçını buraxacaq. Müsabiqənin qalibləri mart ayında Vyanada təşkil olunacaq beynəlxalq Avropa innovativ müəllimlər forumunda Azərbaycanı təmsil etmək hüququ qazanacaqlar.
E.Axundovun sözlərinə görə, ənənəvi təhsil üsullarından fərqli olaraq, təqdim olunmuş innovativ resurslar vasitəsilə şagirdlər bu və ya digər fənn üzrə müstəqil şəkildə araşdırma apara bilməlidir. Müsabiqənin tələblərinə görə, finalçıların seçimi zamanı xüsusi diqqət İKT vasitəsilə yaradılmış layihələrə yetiriləcək. Yəni, müəllimin tədris metodu əsasında şagirdlərin işi layihə çərçivəsində elektron təqdimat, video-fayllar, rəqəmli təsvir, veb-səhifə və digər oxşar vasitələrlə təqdim olunmalıdır.
Müsabiqə zamanı şagirdlərə yalnız bilik verən layihələrə deyil, məhz onları düşündürərək bilik verən layihələrə üstünlük veriləcək.