İnfrastruktur

Ana səhifə

İnfrastruktur

Azərbaycanı «MEFTEC-2009» sərgisində «SİNAM» şirkəti təmsil edəcək

05 fevral 2009 12:01 (UTC +04:00)

Bakı. Aynur Vəliyeva – APA-Economics. Azərbaycanın «SİNAM» şirkəti informasiya texnologiyalarının maliyyə sahəsində tətbiqinə həsr olunmuş «MEFTEC-2009» beynəlxalq sərgisində iştirak edəcək. Sərgi fevral ayının 10-11-də Manamada (Bəhreyn) keçiriləcək.
Şirkətin baş ofisindən «APA-Economics»ə verilən məlumata görə, sərgi qeyd edilən sahədə dünyanın ən iri ixtisaslaşdırılmış tədbirlərdən biridir. Sərginin əsas mövzuları bank və maliyyə proqram təminatları, bank üçün avadanlıq, korporativ seqmentdə proqram təminatı, İT-infrastruktur və İT-xidmətlər olacaq.
«SİNAM» şirkəti sərgidə öz xarici tərəfdaşı olan Britaniyanın «Colvir Software Solutions Ltd.» şirkəti ilə birgə iştirak edəcək. Britaniya şirkəti MDB ölkələrində geniş fəaliyyət göstərir və əsas fəaliyyət istiqaməti idarəetmə və avtomatlaşdırma üzrə konsaltinq xidmətləridir.
Xatırladaq ki, «SİNAM» şirkəti 1994-cü ildə təsis edilib və işçi heyətinin əsasını Azərbaycan Milli Elmlər Akademiyası Kibernetika İnstitutunun mütəxəssisləri təşkil edir.
«SİNAM» şirkəti 2005-ci ildə Rabitə və İnformasiya Texnologiyaları Nazirliyi ilə birgə elektron avadanlığının istehsalı üzrə ixtisaslaşmış «KÜR» müəssisəsini təsis edib. Bu müəssisə Cənubi Qafqaz və Mərkəzi Asiya regionunda kompüterlərin konveyer istehsalı üzrə ixtisaslaşmış yeganə müəssisədir.