İnfrastruktur

Ana səhifə

İnfrastruktur

Bakı Beynəlxalq və Şəhərlərarası Avtovağzal kompleksinin açılışı olub

12 fevral 2009 15:08 (UTC +04:00)

Bu barədə «APA-Economics»ə Nəqliyyat Nazirliyi katibliyinin müdiri Namiq Həsənov məlumat verib. Avtovağzalın açılış mərasimində Azərbaycan prezidenti İlham Əliyev də iştirak edib.
N.Həsənovun sözlərinə görə, bundan sonra Bakıdan rayonlara, eləcə də xarici ölkələrə sərnişin avtobusları yeni avtovağzaldan yola düşəcək, eyni zamanda paytaxta gələn avtobuslar bu avtovağzala qəbul ediləcək. Bakı-Sumqayıt-Bakı marşrut avtobusları da indiyədək olduğu kimi «20 Yanvar» metro stansiyasının qarşısından deyil, yeni avtovağzaldan yola düşəcək.
Nazirlik rəsmisi əhalinin avtovağzaldan istifadəsində çətinliyin yaranmaması üçün bir sıra marşrutların hərəkət sxemində dəyişikliklərin edildiyini deyib. Həmçinin, avtovağzala şəhərin mərkəzindən 284 saylı yeni bir marşrut açılacaq.
Qeyd edək ki, avtovağzal kompleksinin tikintisinə 2004-cü ilin may ayından başlanıb. Kompleksdə 110 min kubmetrdən çox dəmir-beton, şüşə-metal konstruksiya sisteminin yaradılmasında 1600 ton metal və 24 min kv. metr şüşə lövhələrdən istifadə edilib.
Kompleksdə istifadə olunan materiallar və quraşdırılan avadanlıqlar Almaniya, İtaliya, Yaponiya, Koreya, İsveçrə, Fransa, Ukrayna, Türkiyə, İran, Çin, Rusiya, Birləşmiş Ərəb Əmirlikləri, Hindistan və digər ölkələrə məxsus şirkətlərin istehsalıdır. Bakı-Sumqayıt yolunun şərqində 21,39 hektarlıq sahəni əhatə edən avtovağzal kompleksi gün ərzində 18-20 min sərnişinə xidmət etmək, 800-950 avtobusu qəbul edib yola salmaq gücünə malikdir.
Ümumi sahəsi 170 min kv. metr ərazini əhatə edən avtovağzal kompleksinə 700 yerlik avtomobil dayanacağı, I, II, III və IV mərtəbədə yerləşən ticarət mərkəzi, III mərtəbədə yerləşən avtobus platforması, habelə sərnişin avtobuslarının dayanması üçün meydançalar, ana və uşaq otağı, poçt, teleqraf, bank, rəsmi şəxslər üçün xüsusi xidmət otağı, gözləmə zalları, kafe və yeməkxanalar, yük saxlama kameraları, oyun zalı, tibb məntəqəsi, 5 mərtəbəli 93 yerlik 4-ulduzlu mehmanxana daxildir.
Kompleksdə 14 eskalator və 10 lift quraşdırılıb. Kompleksdə müasir istilik və soyutma, ventilyasiya, video-müşahidə, siqnalizasiya, işıqlandırma sistemləri quraşdırılıb və proqramlaşdırılıb. Bütün bu sistem mərkəzləşdirilərək kompüterlə vahid məntəqədən idarə olunur.
Avtovağzal kompleksinə daxil olan texniki servis mərkəzi və yanacaqdoldurma stansiyası 24 saat ərzində xidmət göstərəcək. Qış mövsümündə platforma hissəsinə qalxan körpülərin üzərinin buz bağlamasının qarşısını almaq üçün qızdırıcı sistemlə təmin edilib.