İnfrastruktur

Ana səhifə

İnfrastruktur

Azərbaycanın tikinti materialları bazarında qiymətlər son bir ildə 35% düşüb

13 fevral 2009 06:33 (UTC +04:00)

Bakı. Vüqar İsrafilov – APA-Economics. Azərbaycanın tikinti materialları bazarında son bir ildə 35,1% səviyyəsində qiymət azalması müşahidə olunub. Bu barədə «APA-Economics»ə «Əmlak Bazarı İştirakçıları» (ƏBİ) İctimai Birliyindən məlumat verilib.
ƏBİ-nin araşdırmalarına əsasən, ölkədə istehsal olunan inşaat məhsullarının ümumi təklifdə həcmi 54,1% təşkil edib. Dünya maliyyə böhranı tikinti materiallarının qiymətlərində ucuzlaşmanı dərinləşdirməkdə davam etdirir. Belə ki, bu bazarda qiymət əmsalı cari ilin yanvar ayında 2008-ci ilin dekabrına nisbətən 0,7% azalaraq 104,4 səviyyəsində qərarlaşıb.
Hesabat ayı ərzində «ƏBİ» tərəfindən Bakı şəhəri üzrə tikinti materialları bazarında 38 adda, 85 çeşiddə tikinti materiallarının qiymətləri izlənilib. Maraqlıdır ki, dekabrdan fərqli olaraq, yanvar ayında bəzi yerli məhsulların qiymətlərində artım müşahidə olunub. Bu amil orta qiymətlərin kəskin azalmasının qarşısını alıb. Buna baxmayaraq, yanvarda katinka 7,5%, şveller 16%, dəmir təbəqə 1,4%, dam örtüyü 7%, armatur 0,9%, şüşə 9,8%, mişar daşı 16,1%, taxta 2,5%, dikt 14,8%, şifer 8,7%, elektrod 11,4%, yapışqan 10%, kafel-metlax yapışdırıcısı 4,2% ucuzlaşıb.
Xatırladaq ki, dekabr ayında 85 adda məhsuldan 29-u üzrə qiymət azalması, 13-ü üzrə qiymət artımı, 43-ü üzrə isə sabitlik müşahidə olunub. Nəticədə, ay ərzində bazarda formalaşan orta qiymətlərdə azalma əvvəlki ayla müqayisədə 0,8% təşkil edib.