İnfrastruktur

Ana səhifə

İnfrastruktur

Azərbaycan üzrə su sayğaclarının quraşdırılması səviyyəsi 33%-ə çatıb

13 fevral 2009 10:41 (UTC +04:00)

«APA-Economics»in məlumatına görə, bunu bu gün keçirdiyi mətbuat konfransında «Azərsu» SC-nin prezidenti Nizaməddin Rzayev bildirib.
N.Rzayevin sözlərinə görə, ötən il abonentlərin su xətləri üzərində 120 531 sayğac quraşdırılıb. Bunun 118 632-si əhali, 1 899-u isə müəssisə və təşkilatlar olub. O cümlədən, hesabat dövründə Bakıda 93 429 sayğac quraşdırılıb: «Bakı şəhərində 500 minə yaxın abonentimiz var. Bu günə qədər onların 50%-i sayğaclaşdırılıb».
N.Rzayev ötən il ölkə ərazisində 252,2 km uzunluğunda su xətti və 85,4 km uzunluğunda kanalizasiya kollektorunun quraşdırıldığını, 3 su qəbuledici qurğu, 2 kanalizasiya nasos stansiyası, 4 istehsalat binasının tikildiyini, 7 subartezian quyusunun qazıldığını bildirib.
Səhmdar cəmiyyətinin rəhbəri əlavə edib ki, hazırda Bakı və Abşeron yarımadasından çirkab suların təmizlənmədən Xəzər dənizinə axıdılmasının qarşısını almaq məqsədi ilə iş aparılır. Əvvəlki illərdə Xəzər dənizinə gündə 135 min kubmetr çirkab su təmizlənmədən axıdıldığı halda, bu gün həmin göstərici 35 min kubmetrə enib.
«Azərsu» rəhbəri qeyd edib ki, əhaliyə verilən suyun tərkibinin bəzən həddən artıq lilli olması suyun götürüldüyü mənbələrdə lillənmə ilə əlaqədardır. Bəzən «Azərsu»nun sutəmizləyiciləri suyun tərkibini durulda bilmir və nəticədə əhaliyə verilən su lilli olur.
«Sumqayıtelektrikşəbəkə» ASC-yə olan borclara gəlincə, N.Rzayev fevralın 16-da «Azərsu»nun müəssisələrinin enerji təchizatının dayandırılmaması üçün danışıqlar aparıldığını qeyd edib. Lakin borclarının heç də «Sumqayıtelektrikşəbəkə»nin təqdim etdiyi məbləğdə - 47,102 mln. manat deyil, 45,136 mln. manat olduğunu vurğulayıb.