İnfrastruktur

Ana səhifə

İnfrastruktur

Azərbaycan yaxın vaxtlarda «AzDATACOM» şəbəkəsinin yeni seqmentini istifadəyə verəcək

16 fevral 2009 13:56 (UTC +04:00)

Bakı. Aynur Vəliyeva – APA-Economics. Azərbaycanda yaradılan «AzDATACOM» yüksürətli multiservis şəbəkəsinin Sahil-Astara seqmenti yaxın vaxtlarda istismara veriləcək.
Rabitə və İnformasiya Texnologiyaları Nazirliyinin Məlumat Hesablama Mərkəzindən «APA-Economics»ə verilən məlumata görə, bu günə kimi «AzDATACOM» magistral şəbəkəsinin Sahil-Astara, Yevlax-Şirvan, Gəncə-Qazax istiqamətlərində optik bağlantı təmin olunub və Bakı, Gəncə, Ağcabədi, Bərdə, Beyləqan seqmentləri istismara verilib. İstifadəyə verilən seqmentlər üzrə şəbəkə 10 Gbit/saniyə sürəti ilə informasiyaların ötürülməsini təmin edir.
«AzDATACOM» şəbəkəsi şirkətlərə korporativ şəbəkə yaratmaq imkanı verəcək. Şəbəkə «Alcatel» şirkətinin bazası əsasında qurulub, texniki təminat işləri isə «Sinam» şirkəti tərəfindən görülüb.
Bu şəbəkə vasitəsilə video xidmətlər, multimedia xidmətləri, səsin ötürülməsi, virtual gizli şəbəkələrin (VPN) təşkili, genişzolaqlı xidmətlərin istifadəçilərə çatdırılması və s. xidmətlər göstərmək mümkündür.
Xatırladaq ki, bütün respublikanı əhatə edən vahid korporativ «AzDATACOM» şəbəkəsinin yaradılması layihəsi «Elektron Hökumət» Proqramın birinci mərhələsi - «e-infrastruktur»un tərkib hissəsidir, icraçı rolunda isə BMT-nin İnkişaf Proqramı (UNDP) və Rabitə və İnformasiya Texnologiyaları Nazirliyi çıxış edir.
Qeyd edək ki, Proqramın ikinci mərhələsi «e-sənəd», üçüncü mərhələsi isə «e-ödəniş»dir.
«AzDATACOM» istənilən dövlət və özəl sektora aid idarə, bank, müəssisə və təşkilatların, hər-hansı ticarət şəbəkəsinin, anbarların və digər biznes strukturları olan iri bir müəssisənin bir-birindən uzaqda yerləşən filiallarının və onların əməkdaşlarının qarşılıqlı əlaqəsinin müəyyən zaman ərzində bir mərkəzdən idarə olunması üçün yüksək sürətli multiservis şəbəkəsinə malikdir. Bununla yanaşı, «AzDATACOM» şəbəkəsinin imkanlarına İnternetə yüksək sürətlə çıxış, İnternet protokol üzərindən səsin ötürülməsi (IP telefoniya), oyunlar və əyləncə, video konfrans rabitəsinin təşkili, distant təhsil, teletibb, axın videosu (IPTV), sorğuya uyğun video (Video on Demand), məlumatın saxlanılması, sifariş xidmətləri, interaktiv xidmətlər, Triple-Play xidmətlərinin göstərilməsi daxildir.