İnfrastruktur

Ana səhifə

İnfrastruktur

Azərbaycanın iki İT sistemi Bəhreyndə keçirilən beynəlxalq sərgidə təqdim olunub

20 fevral 2009 13:43 (UTC +04:00)

Bakı. Aynur Vəliyeva – APA-Economics. Azərbaycanın «SİNAM» İKT şirkəti Bəhreyndə keçirilmiş «MEFTEC-2009» beynəlxalq sərgisində iştirak edib. Sərgi informasiya texnologiyalarının maliyyə sahəsində tətbiqi məsələlərinə həsr olunmuş dünyanın ən iri xüsusi tədbirlərindən biridir. Şirkətin baş ofisindən «APA-Economics»ə verilən məlumata görə, sərginin əsas mövzuları bank və maliyyə proqram təminatları, bank üçün avadanlıq, korporativ seqmentdə proqram təminatı, İT-infrastruktur və İT-xidmətlər olub.
«SİNAM» şirkəti sərgidə öz xarici tərəfdaşı olan Böyük Britaniyanın «Colvir Software Solutions Ltd.» şirkəti ilə birgə iştirak edib. Britaniya şirkəti Rusiya və MDB ölkələrində fəaliyyət göstərir və əsasən idarəetmə və avtomatlaşdırma sahələrində konsaltinq xidmətlərinin göstərilməsi üzrə ixtisaslaşıb. Sərgidə «SİNAM» şirkəti kommunal ödənişlər sistemini (APUS) və «Colvir» sistemini təqdim edib.
Qeyd edək ki, APUS billinq sistemlərinin tətbiqi sahəsində fəaliyyət göstərən «CheckFree» Korporasiyasının təchiz etdiyi platform əsasında yaradılıb. Sistemin əsas xüsusiyyətlərindən biri cari borcları həm istənilən poçt şöbələrindən və sistemə qoşulmuş çoxsaylı banklardan, həm də İnternet vasitəsilə elə birbaşa ödəmək imkanının olmasıdır. Həmçinin, bu sistem vasitəsilə ödənişlər və borclar haqqında statistik məlumatlar almaq mümkündür. Gələcəkdə APUS ilə digər xidmətlər üzrə də ödənişlərin (məsələn, mobil telefon danışıqları və s.) aparılması planlaşdırılır.
«Azərpoçt» Dövlət Müəssisəsində tətbiq olunan «Colvir» sistemi özündə tam miqyaslı poçt fəaliyyətinin imkanlarını birləşdirən çoxfunksiyalı bank sistemidir. Sistem müxtəlif rabitə kanalları ilə qoşularaq məsafədən fəaliyyəti təmin edir və ölkə üzrə bütün şöbələr mərkəzləşdirilmiş məlumat bazası əsasında işləyir. Bununla da operativ şəkildə analitik hesabatları əldə etmək mümkün olur. Bundan əlavə, həmin sistem istənilən bank və poçt xidmətlərini təmin edir ki, bu da poçtu müştərilər üçün daha cəlbedici edir.
Xatırladaq ki, «SİNAM» şirkəti 1994-cü ildə təsis edilib. Şirkətin heyətinin əsasını Azərbaycan Milli Elmlər Akademiyasının Kibernetika İnstitutunun mütəxəssisləri təşkil edir. «SİNAM» 2005-ci ildə Azərbaycan Rabitə və İnformasiya Texnologiyaları Nazirliyi ilə birlikdə elektron avadanlığın istehsalı üzrə ixtisaslaşmış «KÜR» müəssisəsini (Mingəçevir şəhəri) təsis edib. Bu, Cənubi Qafqaz və Mərkəzi Asiya regionunda kompüterlərin konveyer istehsalı ilə məşğul olan yeganə müəssisədir.