İnfrastruktur

Ana səhifə

İnfrastruktur

Azərbaycanda ISO/IEC 15408-2008 beynəlxalq standartın bazasında hazırlanmış milli standartın layihəsi təsdiqlənib

26 fevral 2009 12:09 (UTC +04:00)

Bakı. Aynur Vəliyeva – APA-Economics. Azərbaycanın rabitə və informasiya texnologiyaları nazirinin müavini Elmir Vəlizadənin sədrliyi ilə İKT-nin Standartlaşdırılması üzrə Texniki Komitənin növbəti iclası keçirilib.
Rabitə və İnformasiya Texnologiyaları Nazirliyindən «APA-Economics»ə verilən məlumata əsasən, iclasın gündəliyinə uyğun olaraq, ilk növbədə informasiya təhlükəsizliyi üzrə ISO/IEC 15408-2008 beynəlxalq standartın bazasında hazırlanmış Azərbaycan milli standartının layihəsi təsdiqlənib.
Texniki Komitənin qərarına əsasən, dövlət qeydiyyatından keçməsi üçün layihə Standartlaşdırma, Metrologiya və Patent üzrə Dövlət Komitəsinə təqdim ediləcək. Bundan əlavə, iclas iştirakçıları Texniki Komitənin 2009-cu il üçün işçi planını müzakirə edib və təsdiqləyiblər.
İşçi planına əsasən, 2009-cu ildə Texniki Komitə tərəfindən informasiya təhlükəsizliyi üzrə beynəlxalq standartlar əsasında milli standartlar və İT-terminologiyası layihələrinin işlənməsi, eləcə də bu layihələrin dövlət qeydiyyatının təmin edilməsi istiqamətində müvafiq işlərin yerinə yetirilməsi nəzərdə tutulub.
Bununla yanaşı, Texniki Komitə bu il başqa təşkilatlar tərəfindən təqdim olunacaq hazır standartları nəzərdən keçirməyi planlaşdırır.
Rabitə və İnformasiya Texnologiyaları Nazirliyinin Standartlaşdırma, Metrologiya və Patent üzrə Dövlət Komitəsi ilə birgə yaratdığı İKT-nin Standartlaşdırılması üzrə Texniki Komitənin əsas məqsədi İKT sektorunda beynəlxalq və regional standartlara uyğun milli standartların tətbiqi, müvafiq normativ sənədlərin hazırlanması, onlardan istifadənin səmərəliliyinin artırılmasıdır.