İnfrastruktur

Ana səhifə

İnfrastruktur

Azərbaycanda «Xalq kompüteri» layihəsinin büdcəsi yaxın günlərdə müəyyənləşəcək

02 mart 2009 11:50 (UTC +04:00)

Bakı. Aynur Vəliyeva – APA-Economics. Azərbaycanda həyata keçirilən «Xalq kompüteri» layihəsinin işçi qrupu bu həftənin sonuna kimi layihənin büdcəsi və maliyyə mənbəyi qismində çıxış edəcək bankı müəyyənləşdirəcək.
«HP» şirkətinin Azərbaycan nümayəndəliyinin rəhbəri Rüfət Hacıəlibəyovun «APA-Economics»ə verdiyi məlumata əsasən, Rabitə və İnformasiya Texnologiyaları Nazirliyi və «HP» şirkəti layihə çərçivəsində alınacaq kompüter və noutbuklar üzrə ödənişlərin vaxtında ödəniləcəyinə zəmanət verəcək. İlkin mərhələdə proqram çərçivəsində pilot layihəsinin həyata keçirilməsi planlaşdırılır.
Qeyd edək ki, layihənin işçi qrupuna yeni daxil olan «HP» şirkəti rəsmi distributoru olan «Bestcomp»la birlikdə bu ilin mart-iyun aylarında həyata keçiriləcək pilot layihənin reallaşdırmasını öz üzərinə götürüb. Pilot layihə çərçivəsində kompüterlər məktəb müəllimlərinə təqdim ediləcək.
İlkin mərhələdə 5 növ kompüterin təqdim edilməsi təklif olunub, bu bir neçə qiymət kateqoriyasına aid olan noutbuklar, netbuk adı ilə tanınan mini kompüterlər və stasionar kompüterlərdir. Kompüterlərin faizsiz kreditlə 2-3 il müddətinə veriləcəyi gözlənilir.
Hazırda Azərbaycanda əhalinin hər 100 nəfərinə 5 kompüter düşürsə, layihənin həyata keçirilməsi nəticəsində bu göstəricinin 20-25-ə çatacağı proqnozlaşdırılır.
Kompüter istehsalçıları istehsal xəttini təşkil etməklə yanaşı sifariş olunmuş kompüterləri təyin edilmiş müddət ərzində «Azərpoçt»la göndərilməsini, təminat müqaviləsi əsasında və ondan sonrakı dövrdə lazımı xidmət və texniki dəstəklə təmin edilməsini öhdəsinə götürəcək.
Kompüter sifarişi «Azərpoçt» DM-nin bütün regional məntəqələrində qəbul olunacaq. Kompüterlərin qiymətləri rəqabətli və bütün regionlar üçün eyni olacaq. Alıcı əldə edəcəyi malın öncədən qiymətinin bir hissəsini ödəyəcək, qalan məbləğ isə sifarişçiyə çatdırıldıqdan sonra ödəniləcək. Sifarişin ödənişi elektron sistem vasitəsi ilə aparılacaq, malların çatdırılması EMS ekspress-çatdırma xidməti ilə həyata keçiriləcək. Hər sifariş fərdi EMS nömrəsi ilə nişanlanacaq ki, bu da onu «AzərEkspressPoçt» rabitə müəssisəsinin İnternet səhifəsi vasitəsi ilə bütün yol boyu hərəkət etməsini izləməyə imkan yaradacaq. Bununla bağlı «Azərpoçt» və «AzərEkspressPoçt» birlikdə www.azems.az veb-saytı hazırlayıb.
Qeyd edək ki, layihə Azərbaycan Rabitə və İnformasiya Texnologiyaları, Təhsil nazirlikləri, «HP» və «Microsoft» şirkətləri ilə birgə həyata keçirilir. Layihənin başlıca məqsədi əhalini güzəştli şərtlərlə kompüterlərlə və kompüterləri lisenziyalı proqramlarla təmin etməkdən ibarətdir.