İnfrastruktur

Ana səhifə

İnfrastruktur

«Ultel» məhdudiyyətsiz ADSL xidmətini ucuzlaşdırıb

02 mart 2009 12:24 (UTC +04:00)

Bakı. Aynur Vəliyeva – APA-Economics. Azərbaycanın «Ultel» şirkəti məhdudiyyətsiz ADSL xidməti üçün yeni tariflərin tətbiqinə başlayıb. Şirkətin baş ofisindən «APA-Economics»ə verilən məlumata əsasən, yeni tarifə uyğun olaraq, 64 Kbit/s sürətlə aylıq məhdudiyyətsiz istifadə 15 manat təşkil edir.
Qeyd edək ki, şirkətin fevralın 1-dən etibarən keçirdiyi reklam kampaniyası çərçivəsində hazırda 64 Kbit/s əvəzinə 96 Kbit/s sürətlə İnternetə qoşulma imkanı təklif edilir.
Bununla yanaşı, «Ultel» şirkəti gənc ailələri və xüsusilə tələbələri geniş zolaqlı ADSL İnternet xidmətinə cəlb etmək məqsədilə 64 Kbit/s sürətlə məhdudiyyətsiz tarif paketini tətbiq edib. Bu paket həmçinin hazırda Dial-up üsulu ilə İnternetə daxil olan istifadəçilər üçün də sərfəlidir. Belə ki, universal kartların istifadəçiləri 22 manat ödəyərək 1 ay ərzində limitsiz İnternetə qoşulma imkanı əldə edirlər. Qeyd etmək lazımdır ki, müqavilə əsasında bu xidmətə qoşulma tarifi 30 manat təşkil edir.
Xatırladaq ki, «Ultel» şirkəti 1996-cı ildən fəaliyyət göstərir. Şirkət simli telefoniya, simsiz CDMA xidmətləri ilə yanaşı İnternet xidmətləri göstərir, o cümlədən ADSL, Dial-up, zəmanətli İnternet xidmətlərini təklif edir. Şirkətin təsisçiləri rolunda Bakı Telefon Rabitəsi İstehsalat Birliyi (28%) və «Azernet» (72%) şirkəti çıxış edir.