İnfrastruktur

Ana səhifə

İnfrastruktur

Azərbaycanın süni rabitə peykinin orbitə çıxarılması layihəsi üzrə keçirilən tenderin qalibi yaxın iki aya məlum olacaq

04 mart 2009 11:34 (UTC +04:00)

Bakı. Aynur Vəliyeva – APA-Economics. Azərbaycanın «AzerSpace» süni milli rabitə peykinin Yerin orbitinə çıxarılması layihəsi çərçivəsində keçirilən tenderin nəticələri bu ilin may ayına kimi müəyyənləşəcək.
Rabitə və İnformasiya Texnologiyaları Nazirliyindən «APA-Economics»ə verilən məlumata görə, tenderdə iştirak üçün dünyanın 10-a yaxın peyk istehsal edən şirkət, o cümlədən ABŞ, Rusiya və Çin şirkətləri dəvət olunub. Onların arasında ABŞ-ın tanınmış «Boeing» və «Orbital Science Corporation» şirkətləri də var.
Qeyd edək ki, layihənin maliyyə mənbəyi təqdim edilən tender təklifləri təhlil olunduqdan sonra ölkə hökuməti tərəfindən müəyyən ediləcək. Nazirlik rəsmiləri layihənin icrasına dövlət büdcəsindən başqa digər mənbələrdən də vəsait cəlb oluna bilər.
«AzerSpace» peykinin gələcəkdə hansı hüquqi formada fəaliyyət göstərəcəyinə gəldikdə isə, bu məsələ hazırda hökumət səviyyəsində müzakirə olunur və peyk alındıqdan sonra dəqiqləşəcək. Peykin dövlət qurumu nəzdində və ya birgə müəssisə formasında fəaliyyət göstərəcəyi istisna olunmur.
Hazırda Beynəlxalq Telekommunikasiya İttifaqı (ITU) Azərbaycana iki orbital mövqe təqdim edib, lakin bu, Yerin əhatə dairəsi üçün məhdudiyyət təşkil etdiyinə görə, RİTN orbital mövqeni 20 il müddətinə icarəyə götürərək süni peyk layihəsini həyata keçirir.
Qeyd edək ki, layihə Azərbaycan prezidentinin respublikada kosmik sənayenin yaradılması və telekommunikasiya peyklərinin orbitə çıxarılması ilə bağlı sərəncamı əsasında həyata keçirilir.
Süni milli rabitə peyklərinin orbitə 2011-ci ilədək çıxarılacağı gözlənilir. Hazırda Azərbaycanın televiziya kanalları müxtəlif xarici peyklərdən yayımlanır. Milli peyk orbitə çıxarılandan sonra isə kanallar bu peyk vasitəsi ilə yayımlana biləcək. Bu layihə Azərbaycanın beynəlxalq kosmik bazara çıxışını təmin edəcək. Layihə kommersiya tipli və rentabellidir. Dünyada süni peykin buraxılması layihəsinin icrası 100-160 mln. ABŞ dollarına başa gəlir. Azərbaycan milli peykinin Skandinaviya ölkələri istisna olmaqla, Avropanı tam, Qazaxıstanın böyük hissəsini əhatə etməklə isə Asiyanın yarısını əhatə etməsini istəyir.