İnfrastruktur

Ana səhifə

İnfrastruktur

Azərbaycanın təhsil sektoru üçün Data Mərkəzi yaradılır

05 mart 2009 09:36 (UTC +04:00)

Bakı. Aynur Vəliyeva – APA-Economics. Azərbaycanda Təhsil sisteminin informasiyalaşdırılması üzrə Dövlət Proqramı çərçivəsində Məlumat və Resurs Mərkəzi (Data Mərkəzi) yaradılır. İKT Mərkəzindən «APA-Economics»ə verilən məlumata əsasən, mərkəzin yaradılması «Intel», «HP», «Microsoft», «Cisco» şirkətlərinin Azərbaycanda rəsmi tərəfdaşı olan «Ultra» şirkəti tərəfindən həyata keçirilir.
«Ultra» şirkətinin rəhbəri Tahir Mirkişilinin sözlərinə görə, dünyanın aparıcı şirkətlərinin təqdim etdiyi müasir texnologiyaların tətbiqi sayəsində Məlumat və Resurs Mərkəzinin funksionallığı olduqca genişdir və ən müasir texnoloji standartlara cavab verir.
T.Mirkişili qeyd edib ki, Azərbaycanın təhsil şəbəkəsində İnternetə «giriş və çıxış nöqtəsi» olmaqla yanaşı Mərkəz həmçinin təhsilə aid informasiya resurslarının toplanacağı yer olacaq. Mərkəzdə xüsusi təhlükəsizlik qəfəsi qurulub, bütün avadanlıqların 24 saat və rezervlə çalışması üçün hər cür texniki imkan yaradılıb.
Mərkəzdə Azərbaycan təhsil şəbəkəsinin məlumatlarını yerləşdirmək üçün ən müasir İntel platformalı dörd nüvəli HP serverləri quraşdırılıb. Məlumat və Resurs Mərkəzində quraşdırılacaq verilənlər bazası eyni anda milyonlarla əməliyyat həyata keçirmək gücünə malikdir. Bundan əlavə, Mərkəzdə Azərbaycanda analoqu olmayan ən yeni fiziki təhlükəsizlik sistemləri quraşdırılıb ki, bu da toplanılacaq məlumatlara kənar müdaxilələrin qarşısını alacaq.
Quraşdırılmış avadanlıq Mərkəzə xüsusi mərkəzləşdirilmiş antivirus proqram təminatının məktəb kompüterlərində avtomatik olaraq yeniləşdirilməsinə, bütün məktəb kompüterlərinin birbaşa mərkəzdən idarə olunmasına imkan verir.
T.Mirkişilinin sözlərinə görə, mərkəzdə quraşdırılmış texnologiya konfrans zalından Azərbaycan təhsil şəbəkəsinə qoşulmuş bütün məktəblərə eyni zamanda video-konfranslar, mühazirələr və ya açıq dərslər keçirməyə imkan yaradacaq.
Mərkəzin serverində həmçinin Azərbaycan məktəblərinin elektron xəritəsi də yerləşdiriləcək və bu resurs vasitəsilə məktəblər haqqında bütün zəruri məlumatlar əldə etmək mümkün olacaq.
Bununla yanaşı, təhsil sisteminin informasiyalaşdırılmasının effektivliyini təmin etmək məqsədi ilə «Call-Centre»in yaradılması üzrə iş aparılır. Məlumat və Resurs Mərkəzinin nəzdində yaradılan «Call-Centre» vahid telefon nömrəsi vasitəsilə informasiya təhlükəsizliyi, texniki dəstək və digər xidmətlərlə əlaqəni asanlaşdıracaq.