İnfrastruktur

Ana səhifə

İnfrastruktur

Rudi Kozak: «Azərbaycanda milli valyutanın stabilliyi nəticəsində infrastrukturun inkişafına investisiya yatırılır»

12 mart 2009 14:13 (UTC +04:00)

Bakı. Aynur Vəliyeva – APA-Economics. ABŞ-ın «Hewlett Packard» şirkətinin MDB ölkələri üzrə baş direktoru Rudi Kozak Bakıda Azərbaycanda fəaliyyət göstərən top-sifarişçilər üçün seminar keçirib. Seminarın sessiyalarından biri şirkətin lider olduğu sahələrdən biri – «Blade» serverlərinə həsr edilib.
R.Kozakın «APA-Economics»ə verdiyi məlumata əsasən, «Blade» serverləri kiçik məkanda yüzlərlə serverlərin quraşdırılmasına imkan verən və elektrik enerjisinə qənaət edən proqressiv texnologiyadır.
Qeyd edək ki, bu cür serverlər DATA mərkəzlərinin yaradılması üçün istifadə olunur. Bu texnologiyanın üstünlükləri dünya üzrə təsdiq edilib və son dövrdə ümumi satışın 20%-i MDB ölkələrinin payına düşüb.
R.Kozakın Bakıya səfəri bir daha HP sistemlərinə, həmçinin «Blade» serverlərinə marağın artmasını təsdiqləyib. Belə ki, ekspertin keçirdiyi görüşlər zamanı mobil rabitə operatorları və banklar ehtiyat sistemlərin yaradılmasına böyük maraq göstəriblər.
Bununla yanaşı ekspert qeyd edib ki, ötən ilin noyabr ayından bu günə kimi HP məhsullarının MDB ölkələri bazarında, o cümlədən Azərbaycanda 29% artım müşahidə olunub. Bu da milli valyutanın stabilliyinin nəticəsidir ki, şirkətlər infrastrukturun inkişafına investisiya yatırır.
«Ukrayna və digər ölkələrdə vəziyyət heç də belə deyil. Azərbaycanda IT bazarının inkişaf templəri neftin qiymətindən və valyutanın vəziyyətindən asılı olacaq. Məsələn, Ukraynada milli valyutanın devalvasiyası idxalın azalmasına gətirib çıxarıb və bununla yanaşı yerli istehsala tələbat artıb», - deyə R.Kozak vurğulayıb.