İnfrastruktur

İnfrastruktur

Yaxın günlərdə Abşeronda NGN şəbəkəsinin testləşməsinə başlanacaq

06 aprel 2009 06:52 (UTC +04:00)

Bakı. Aynur Vəliyeva – APA-Economics. Abşeronda NGN şəbəkəsinin qurulması üzrə montaj işləri başa çatdırılıb. «İskratel» MMC-dən «APA-Economics»ə verilən məlumata əsasən, bu həftədən etibarən şəbəkənin test rejimində istifadəsinə başlanılır.
Qeyd edək ki, Abşeronda NGN şəbəkəsi «Iskratel»in avadanlığı hesabına tenderin qalibi olmuş «Komplas» şirkəti tərəfindən qurulur. Şəbəkənin yenidən qurulması nəticəsində ümumi nömrə tutumu 50 mindən yuxarı təşkil edəcək. İlkin mərhələdə 5 stansiyanın, o cümlədən 12 936 nömrə tumuna malik olan Xırdalan Mərkəzi ATS, 3 072 nömrəlik Masazır, 5 120 nömrəlik Sulutəpə, 1 024 nömrəlik Çiçək, 1 024 nömrəlik Atyalı-Nübar və 2 048 nömrəlik Saray stansiyalarının istismara verilməsi nəzərdə tutulub.
NGN (gələcək nəsil şəbəkəsi) çoxsaylı universal şəbəkədən ibarətdir. O, kommutasiya zərflərindən istifadə vasitəsilə danışıq, təsvir və məlumatların ötürülməsi üçün təyin edilib.
NGN şəbəkəsi telekommunikasiya trafiklərinin müxtəlif növləri üçün lazım olan xidmət keyfiyyətini təmin edir. Yuxarıda göstərilən texnologiyanın tətbiqi abunəçilərə VoIP-telefoniya, səs poçtu, məlumatların ötürülməsi, multimedia xidmətləri, virtual xüsusi şəbəkə, məlumatların unifikasiya mübadiləsi, məlumatların ani mübadiləsi, interaktiv nitq cavabı sistemi üzrə xidmət, interaktiv oyunlar, videokonfrans və ev meneceri kimi xidmətlərdən istifadə etmə imkanı verəcək.
Xatırladaq ki, «Iskratel» şirkətinin baş ofisi 1989-cu ildə «Iskra Telematika» və «Siemens A.G.» şirkətləri tərəfindən təsis edilib. Şirkətin əsas fəaliyyəti gələcəyin informasiya cəmiyyətinin stasionar və mobil telefoniya, konvergent şəbəkələri, yeni nəsil şəbəkələri sahəsində kommunikasiya ehtiyaclarını təmin etmək üçün kompleks həllərin hazırlanmasıdır.