İnfrastruktur

İnfrastruktur

Azərbaycanda dövlət ehtiyacları üçün alınan daşınmaz əmlakın satınalma qiymətinin hesablanması qaydaları təsdiqlənib

09 aprel 2009 07:35 (UTC +04:00)

Bakı. Vüqar İsrafilov – APA-Economics. Azərbaycan Nazirlər Kabineti dövlət ehtiyacları üçün alınan daşınmaz əmlakın satınalma qiymətinin hesablanması qaydalarını təsdiq edib. Bu barədə «APA-Economics»ə hökumətdəki mənbələrdən məlumat verilib.

Bu qərar 2007-ci ilin sonunda Mülki Məcəlləyə tətbiq edilən dəyişikliklər və ölkə prezidentinin müvafiq fərmanının icrasını təmin etmək məqsədi ilə qəbul edilib. Sənədə əsasən, dövlət ehtiyacları üçün alınan daşınmaz əmlakın satınalma qiymətinin hesablanması Dövlət Əmlakının İdarə Edilməsi üzrə Dövlət Komitəsinə (DƏİDK) həvalə olunub. Eyni zamanda, həmin qurum tərəfindən daşınmaz əmlakın alınması üçün ehtimal olunan xərclərin hesablanmasına dair tövsiyələr hazırlanmalıdır. Bundan başqa, Maliyyə və İqtisadi İnkişaf nazirlikləri ilə razılaşdırmaq şərti ilə satınalma proseduralarında iştirak edən qiymətləndiricilərin ixtisas göstəricilərinə dair minimum tələblər müəyyən olunmalıdır.

Qeyd edək ki, yuxarıda adı çəkilən qaydalara görə, dövlət ehtiyacları üçün alınan daşınmaz əmlakın satınalma qiymətinin hesablanması onun yerləşdiyi ərazidə və ya ona yaxın ərazidə olan oxşar və ya həmin daşınmaz əmlaka ekvivalent olan əmlak barəsində adi mülki dövriyyə şəraitində bağlanan əqdlər üzrə aparılacaq. Bu zaman əmlakın alınmasına səbəb olan təcililiyin dərəcəsi, torpaq sahəsinin satışından imtina edən mülkiyyətçinin müvafiq qərarı məhkəmə çəkişməsi ilə bağlı xərclər, torpağın istifadəsindən əldə ediləcək gəlirlərin gələcəkdə artması və ya azalması barədə proqnozlar, yeni inşa ediləcək hər hansı tikililərlə bağlı məsrəflər nəzərə alınacaq.

Daşınmaz əmlakın dövlət ehtiyacları üçün alınması barədə qərar yalnız Nazirlər Kabineti tərəfindən DƏİDK, İqtisadi İnkişaf və Maliyyə nazirliklərinin birgə vəsatəti əsasında baxılıb qəbul edilə bilər. Vəsatətin təqdim edilməsi zamanı alınacaq sahələrin ölçülərini əks etdirən xəritələr, torpağın təyinatları və mülkiyyət növü barədə məlumat, orada yerləşən və eyni məqsədlə alınan daşınmaz əmlakın (bina, tikililər, qurğular) siyahısı, mülkiyyət növü, texniki pasportu, plan cizgisi, əmlakın alınmasının təsirinə məruz qala biləcək şəxslərin tam siyahısı, bu əməliyyat üçün ehtimal olunan xərclər və həmin xərclərin maliyyələşdirilməsinin mənbəyi barədə məlumat açıqlanmalıdır.

Nazirlər Kabinetinin təsdiq etdiyi qaydalar həmçinin dövlət ehtiyacları üçün istifadə olunacaq daşınmaz əmlakın alınması üçün büdcədən ayrılan vəsaitlərin mülkiyyətçilərə 120 təqvim günündən gec olmayaraq ödənilməsini nəzərdə tutur.