İnfrastruktur

İnfrastruktur

Azərbaycanda «Xalq kompüteri» layihəsinə start verilib

10 aprel 2009 15:03 (UTC +04:00)

Bakı. Aynur Vəliyeva – APA-Economics. Bu gün Bakıda «Xalq kompüteri» layihəsinin icrasına başlanması ilə bağlı təntənəli imzalanma mərasimi keçirilib. «APA-Economics»in məlumatına görə, tədbirdə rabitə və informasiya texnologiyaları naziri Əli Abbasov, təhsil naziri Misir Mərdanov, HP şirkətinin Azərbaycandakı nümayəndəliyinin rəhbəri Rüfət Hacıəlibəyov, «Microsoft Azərbaycan» şirkətinin baş meneceri Teymur Axundov iştirak ediblər.
«Xalq kompüteri» layihəsinin əsas məqsədləri əqli əməyin təşviqi, bilik iqtisadiyyatı yönümlü kadrların hazırlanması, İKT yönümlü kadrların hazırlanmasının stimullaşdırılması, E-hökumətin inkişaf etdirilməsi, təhsil sisteminin dəstəklənməsi, intellektual mülkiyyətin qorunması, kompüter vərdişlərinin təşviqi, aztəminatlı sosial qrupların dəstəklənməsi, əhalinin kompüterlərlə təminatına şəraitin yaradılması, kompüterlərin sayının dünyanın orta göstəricilərinə çatdırılmasıdır.
Ə.Abbasovun sözlərinə görə, ilkin mərhələdə 4 ay müddətini əhatə edən pilot layihəsi həyata keçiriləcək. Bu müddət ərzində layihə çərçivəsində müəllimlər kompüterlər əldə edə biləcək. Gələcəkdə layihənin digər sosial qruplar üçün də (tələbələr, həkimlər, dövlət qulluqçuları və s.) həyata keçirilməsi nəzərdə tutulur.
Layihə çərçivəsində HP şirkətinin mini-noutları (MiniNote), noutbukları (Laptop) və stolüstü kompüterləri (Desktop) təqdim olunacaq. Bütün bu avadanlıqlarda «Microsoft» şirkətinin lisenziyalı proqram təminatı quraşdırılıb. Bu, Azərbaycan Təhsil Nazirliyi ilə «Microsoft» Korporasiyası arasında imzalanmış Məktəb Sazişi çərçivəsində həyata keçirilir.
Bütün avadanlıqlar faizsiz olaraq 12 ay müddətinə kreditə verilir. «Xalq kompüteri» layihəsi çərçivəsində təqdim olunan kompüterlər bazar qiymətlərindən 25-40% aşağı olacaq. Bütün kompüter alan müəllimlərə əlavə olaraq Təhsil Nazirliyi tərəfindən elektron dərsliklər, «Aztelekom» İstehsalat Birliyi və BTRİB tərəfindən 100 saatlıq internet kartı təqdim ediləcək.
Kompüterlərin çatdırılması və aylıq ödənişlərin qəbulu «Azərpoçt» Dövlət Müəssisəsi tərəfindən həyata keçiriləcək. Pilot layihə «Azərpoçt», HP və «Microsoft»un lokal tərəfdaşı olan «BestComp Group» şirkəti tərəfindən həyata keçiriləcək.
Layihənin ümumi konsepsiyası bir sıra mühüm dövlət proqramlarına, o cümlədən «Elektron Azərbaycan» Dövlət Proqramına və Azərbaycanda təhsil sisteminin informasiyalaşdırılması üzrə Dövlət Proqramına (2008-2012-ci illər) tam uyğundur.