İnfrastruktur

İnfrastruktur

Azərbaycan paytaxtında ballast sularının idarə edilməsinə dair beynəlxalq seminar keçirilir

14 aprel 2009 09:37 (UTC +04:00)

Bakı. Rəşad Süleymanov – APA-Economics. Bu gün Bakıda «Ballast sularının idarə edilməsinə dair Beynəlxalq Seminar» işə başlayıb. «APA-Economics»in məlumatına görə, Azərbaycan Dövlət Dəniz Administrasiyasının (ARDDA) Beynəlxalq Dəniz Təşkilatı (IMO) ilə birgə keçirdiyi seminarda IMO ekspertləri ilə yanaşı, Qazaxıstan, Türkmənistan, İran və Rusiyadan nümayəndələr iştirak edir.
ARDDA-nın rəisi Qüdrət Qurbanov qeyd edib ki, seminar Azərbaycanın 1995-ci ildən üzv olduğu IMO ilə əməkdaşlıq nəticəsində təşkil edilib. Seminarın məqsədi beynəlxalq dəniz daşımaları zamanı dəniz ətraf mühitinin mühafizəsi, gəmilər tərəfindən dənizin çirklənməsinin qarşısının alınması, dəniz bioloji mühitinin qorunub saxlanması üzrə təcrübə mübadiləsinin aparılması və mövcud təcrübə bazasının təkmilləşdirilməsindən ibarətdir.
«Dənizin gəmilərdən çirklənməsi ilə əlaqədar meydana çıxan problemlərin həll olunması, eləcədə də bu sahəyə nəzarətin həyata keçirilməsi üçün normativ-hüquqi baza mövcuddur. Azərbaycan Dənizin Çirkləndirilməsinin Qarşısının Alınmasına dair Beynəlxalq Konvensiyaya uyğun olaraq bu sahədə müvafiq işlər həyata keçirir», - deyə Q.Qurbanov vurğulayıb.
ARDDA rəisi rəsmi Bakının bu günədək IMO-nun 23 müxtəlif konvensiya və protokollarını ratifikasiya etdiyini vurğulayıb.
IMO-nun eksperti Joze Mayteçkan (Jose Matheickan) isə qeyd edib ki, ballast suları ilə zərərli bakteriyaların və maddələrin Xəzər hövzəsinə gətirilməsinə qarşı mübarizə ümumilikdə region dövlətlərinin əməkdaşlığı çərçivəsində mümkündür.
Qeyd edək ki, beynəlxalq seminar aprelin 17-dək davam edəcək. Sonda iştirakçılara sertifikatlar təqdim olunacaq.