İnfrastruktur

İnfrastruktur

Azərbaycanla «İntersputnik» arasında əməkdaşlıq müqaviləsi imzalanacaq

14 aprel 2009 14:37 (UTC +04:00)

Bakı. Aynur Vəliyeva - APA-Economics. Azərbaycan Rabitə və İnformasiya Texnologiyaları Nazirliyi ilə «İntersputnik» Beynəlxalq Kosmik Rabitə Təşkilatı arasında əməkdaşlıq müqaviləsi imzalanacaq.
Rabitə və informasiya texnologiyaları naziri Əli Abbasovun «APA-Economics»ə verdiyi məlumata əsasən, «İntersputnik» dünyada müşahidə olunan iqtisadi böhrana baxmayaraq, keçən il böyük müvəffəqiyyətlər əldə edib və ümumiyyətlə kosmik sahədə böyük təcrübə və imkanlara malikdir. Azərbaycanın həyata keçirdiyi kosmik proqram çərçivəsində yaxın iki ildə iki süni peyk alaraq orbitə çıxaracaq. «İntersputnik»in bu sahədə böyük təcrübəsi olduğu üçün gələcəkdə bu təşkilat Azərbaycana «Azərsat1» və digər peyklərin («AzerSpace») tutumlarını realizə etməyə kömək edəcək.
Nazirin sözlərinə görə, peyk istehsalçısı olan şirkətlərlə müqavilə imzalandıqdan sonra, RİTN marketinq məsələləri üzrə «İntersputnik»lə müqavilə imzalamağı planlaşdırır.
Hazırda Bakıda səfərdə olan «İntersputnik»in baş direktoru Vadim Belov bununla bağlı bildirib ki, şirkət Azərbaycana bu istiqamətdə yaxından kömək etməyə hazırdır: «Biz uzun müddətdir ki, bu sahədə fəaliyyət göstəririk və gələcəkdə Azərbaycan peykləri orbitə çıxarıldıqdan sonra onların tutumlarını tək Azərbaycanda deyil, xarici ölkələrdə də (Amerika, Afrika və digər qitələrdə) realizə etməkdə və kommersiya uğurlarını əldə etməkdə öz təcrübəmizi əsirgəməyəcəyik».
Bununla yanaşı V.Belov qeyd edib ki, «İntersputnik» şirkəti Rusiyanın «NTV+» telekanallar şəbəkəsini kosmik rabitə ilə təmin edir və təşkilat orbital mövqelərin yerüstü seqmentinin yaradılması təcrübəsi ilə də Azərbaycanla paylaşmağa hazırdır.