İnfrastruktur

Ana səhifə

İnfrastruktur

Gələn il Azərbaycan İKT-nin inkişafına 23 mln. manatdan artıq vəsait ayıracaq

17 oktyabr 2011 13:06 (UTC +04:00)

Bakı. Nicat Mustafayev - APA-Economics. Gələn il Azərbaycanın dövlət büdcəsindən İKT sahəsinə 23,3 mln. manat həcmində vəsaitin ayrılması nəzərdə tutulub.

«APA-Economics»in məlumatına görə, bu barədə Azərbaycan Maliyyə Nazirliyinin dərc etdiyi «Azərbaycanın 2012-ci ilin dövlət və icmal büdcələrinin layihələri»nin təqdimatında bildirilir.

Təqdimatda qeyd olunub ki, telekommunikasiya peykinin orbitə çıxarılması, idarə edilməsi və istismarı işlərinin həyata keçirilməsi üçün «Azərkosmos» ASC-yə büdcədən 3,6 mln. manat və 2011-ci illə müqayisədə 1,5 mln. manat və yaxud 75% çox vəsaitin ayrılması nəzərdə tutulub.

Eyni zamanda dövlət büdcəsindən “Azərbaycanda rabitə və informasiya texnologiyalarının inkişafı üzrə 2010-2012-ci illər üçün Dövlət Proqramı” (Elektron Azərbaycan) çərçivəsində bir sıra dövlət və yerli özünüidarəetmə orqanlarında İKT-nın geniş tətbiqi, müasir standartlara cavab verən, normativ hüquqi aktların tələblərini özündə əks etdirən rəsmi internet saytlarının təkmilləşdirilməsi, vətəndaşlarla daha sıx əlaqəni təmin etmək, rəqabət qabiliyyətli və ixracyönümlü İKT potensialının gücləndirilməsi, milli telekommunikasiya, poçt infrastrukturunun və bir sıra elektron xidmətlərin inkişaf etdirilməsi üçün 10 mln. manat vəsaitin ayrılması planlaşdırılır.

Bundan başqa, «nəqliyyat və rabitə» bölməsi üzrə xərclərdə ölkə ərazisində ictimai nəqliyyatın fəaliyyətinin tənzimlənməsinə, intellektual idarəetmə sisteminin təşkilinə və rəqəmsal taxoqrafların quraşdırılmasına 6 mln. manat, İnformasiya Ehtiyatları və Fərdi Məlumatların İnformasiya Sistemlərinin yaradılmasına 3,7 mln. manat həcmində vəsaitin ayrılması nəzərdə tutulub.