İnfrastruktur

Ana səhifə

İnfrastruktur

ÜGT: Azərbaycanın gömrük xidməti öz inkişafına görə region ölkələrinin gömrük xidmətlərini qabaqlayır

17 oktyabr 2011 16:02 (UTC +04:00)

Bakı. Əli Əhmədov – APA-Economics. Ümumdünya Gömrük Təşkilatının Avropa regional ofisi Avropa regionundakı gömrük xidmətlərinin fəaliyyətinin modernləşdirilməsi ilə məşğul olacaq. «APA-Economics»in məlumatına görə, bu barədə ofisin rəhbəri Vitali Mikeladze bildirib.

«Çalışacağıq ki, ilk növbədə ayrı-ayrı ölkələrini gömrük xidmətlərinin reallaşdırdığı inkişaf proqramları bizim əsas konvensiyalarla uyğunlaşdırılsın, gömrük prosedurları dünya standartlarına cavab versin. Başqa sözlə, prosedurların harmonikləşdirilməsi və onların standartlara uyğunlaşdırılması zəruridir» - deyə V.Mikeladze qeyd edib.

Ofisin fəaliyyətinin ikinci istiqaməti gömrük xidmətlərində tətbiq olunan qabaqcıl və uğurlu təcrübələrin digər ölkələrdə də yayılmasıdır. Nəhayət, 3-cü istiqamət gömrük tədris mərkəzlərinin işinin idarə olunması və onlara rəhbərlik edilməsidir. Söhbət regionun 6 ölkəsində yerləşən və xüsusi olaraq seçilmiş 6 tədris müəssisəsindən gedir. Ofis rəhbərinin sözlərinə görə, ilkin mərhələdə bura Azərbaycanın ali məktəbləri daxil olmayacaq.

Ofis rəhbərinin fikrincə, Azərbaycanın gömrük xidməti öz inkişafına görə regiondakı çox ölkələrin gömrük xidmətlərini qabaqlayır: “Xüsusilə mən informasiya texnologiyalarından istifadənin genişlənməsini və yeni konsepsiyaların, o cümlədən «bir pəncərə»nin tətbiqini nəzərdə tuturam. Bu sahələrdə sizin əməkdaşların bölüşməyə təcrübələri var”.

Qeyd edək ki, Azərbaycanın gömrük xidmətinin əməkdaşları bir qədər əvvəl ÜGT-nin xətti ilə regionun digər ölkələrində İKT-nin tətbiqi üzrə treninqlər keçiriblər.