İnfrastruktur

Ana səhifə

İnfrastruktur

Əmlak Məsələləri Dövlət Komitəsində doqquz ayın yekunları ilə bağlı müşavirə keçirilib

18 oktyabr 2011 09:34 (UTC +04:00)

Bakı. Vahab Rzayev - APA-Economics. Azərbaycanın Əmlak Məsələləri Dövlət Komitəsində (ƏMDK) dövlət əmlakının idarə edilməsi, qorunub saxlanılması, ondan səmərəli istifadə edilməsi, dövlət mülkiyyətinin özəlləşdirilməsi, icarəyə verilməsi, daşınmaz əmlak üzərində hüquqların qeydiyyatı, daşınmaz əmlakın kadastrının aparılması istiqamətlərində 2011-ci ilin doqquz ayında görülmüş işlər və qarşıda duran vəzifələrə dair geniş müşavirə keçirilib.

Komitənin mətbuat xidmətindən “APA-Economics”ə verilən məlumatına görə, tədbirdə ƏMDK sədri Kərəm Həsənov çıxış edərək bildirib ki, 2011-ci ilin 9 ayında dövlət əmlakının qorunub saxlanılması, ondan səmərəli istifadə edilməsi ilə bağlı nizamnamə kapitalında dövlətin payı olan 310-a yaxın səhmdar cəmiyyətindən və idarəetmədə olan 100-ə yaxın dövlət müəssisəsindən balans hesabatları qəbul edilib. Dövlət müəssisəsi və təşkilatından 5 900-ə yaxın xüsusi hesabatın alınması təmin edilib.

Bu il dövlət mülkiyyətinin özəlləşdirilməsi və icarəyə verilməsi, daşınmaz əmlak üzərində hüquqların qeydiyyat sisteminin, habelə reyestrinin aparılmasının təkmilləşdirilməsi və inkişaf etdirilməsi, daşınmaz əmlakın vahid dövlət kadastrı və daşınmaz əmlakın istifadəsinə dair 20-yə yaxın normativ hüquqi sənədin layihələri hazırlanıb və bunlardan 4 sənəd layihəsi təsdiq edilib.

Cari ildə ölkə üzrə kiçik özəlləşdirmə formasında 600-ə yaxın dövlət müəssisə və obyekt, 410-a yaxın obyektin yerləşdiyi torpaq sahəsi özəlləşdirilib. Dövlət müəssisələrinin çevrilməsi nəticəsində yaradılmış səhmdar cəmiyyətlərinin səhmlərinin özəlləşdirilməsi ilə bağlı 40 pul və ixtisaslaşdırılmış pul hərracı keçirilib. İnvestisiya müsabiqəsi vasitəsilə özəlləşdirilmiş müəssisələrə müqavilələr üzrə müsabiqə qalibləri tərəfindən 2011-ci ilin 9 ayında 100 mln. manatdan çox investisiya qoyulub.

Hesabat müddətində 500-ə yaxın qeyri-yaşayış sahəsi icarəyə verilib. Müqavilə müddəti başa çatmış 600-ə yaxın obyekt üzrə icarə müqaviləsinin müddəti uzadılıb. İcarə haqlarını ödəməyən 500-dən çox qeyri-yaşayış sahəsinin icarəçisinə dövlət büdcəsinə yaranmış icarə haqqı borcunun ödənilməsi tələbi ilə xəbərdarlıq məktubları göndərilib. Yanvar-sentyabr ayları ərzində torpaq sahəsinin icarəyə verilməsi ilə bağlı 300-ə yaxın icarə müqaviləsi bağlanılıb.

Qeyd edilib ki, 2011-ci ilin oktyabr ayının 1-dək 6 400-ə yaxın hüquqi şəxs statuslu dövlət müəssisələri və onların 6 000-ə yaxın filiallarının malik olduğu 133 mindən çox daşınmaz əmlakları barədə məlumatlar dövlət əmlakının Registrində qeydiyyata alınıb. Cari ilin yanvar-sentyabr ayları ərzində dövlət əmlakının Registrinə 2 600-dən çox müəssisə və təşkilatdan daşınmaz dövlət əmlakı barəsində baş vermiş dəyişikliklər haqqında Qeydiyyat vərəqələri daxil olub və məlumat bazasına işlənilib. Ötən müddətdə ölkə üzrə 110 minə yaxın daşınmaz əmlak obyekt üzərində mülkiyyət hüquqları qeydiyyata alınıb.