İnfrastruktur

Ana səhifə

İnfrastruktur

Azərbaycanda əmlakın ilkin qeydiyyatı 82% artıb

05 yanvar 2012 13:27 (UTC +04:00)

Bakı. Əli Əhmədov - APA-Economics. Azərbaycanda daşınmaz əmlakın qeydiyyatında kəskin artım qeydə alınıb. Əmlak Məsələləri Dövlət Komitəsindən «APA-Economics»ə verilən məlumata görə, 2011-ci ilin oktyabr ayında ölkədə 12 580 əmlak üzərində mülkiyyət hüququ qeydə alınıb ki, bu da 2010-cu ilin oktyabrına nisbətən 40,8 % artıqdır.

Oktyabrda aparılan qeydiyyatın 4 380-i ilkin, 8 200-ü təkrar qeydiyyata aiddir. İlkin qeydiyyat 64,0%, təkrar qeydiyyat isə 30,9% artıb.

Oktyabrda mülkiyyət hüquqlarının qeydiyyatı aparılan əmlaklardan böyük hissəsini - 38%-ni və ya 4 806-nı torpaq sahəsi təşkil edib. Qeydiyyata alınan əmlakın 4 294-ü mənzil, 2 830-u fərdi yaşayış və bağ evi, 264-ü qeyri-yaşayış binası, 267-si qeyri-yaşayış sahəsi, 75-i əmlak kompleksi, 74-ü çoxillik əkmə olub. Oktyabrda 2 çoxmərtəbəli yaşayış binası qeydə alınıb.

Oktyabrda fərdi yaşayış evlərinin qeydiyyatı 56,3%, torpaq sahələrinin qeydiyyatı 55,7%, qeyri-yaşayış sahələrinin qeydiyyatı 66,9%, əmlak komplekslərinin qeydiyyatı 33,9%, çoxillik əkmələrin qeydiyyatı 68,2% artıb.

Yanvar-oktyabr aylarında isə ölkədə 122 mindən artıq əmlaka aid hüquqlar dövlət qeydiyyatına alınıb. Bu, 2010-cu ilin eyni dövrünə nisbətən 54,0% artıqdır. Komitənin məlumatlarına görə, ötən ilə nisbətən ilkin qeydiyyat 82,1%, təkrar qeydiyyat 41,5% artıb.

İlk 10 ayda mülkiyyət hüquqlarının qeydiyyatı aparılan əmlaklardan 44 325-i mənzil, 43 085-i torpaq sahəsi, 27 368-i fərdi yaşayış və bağ evi olub. Bu dövrdə 3 603 qeyri-yaşayış binası, 2 561 qeyri-yaşayış sahəsi, 738 əmlak kompleksi, 677 çoxillik əkmə, 30 çoxmərtəbəli yaşayış binaları qeydə alınıb.

İlk 10 ayda əmlakın qeydiyyatında regionların payı 62,7%-ə çatıb. Fərdi yaşayış evi, torpaq sahələri, qeyri-yaşayış binaları və əmlak kompleksləri üzrə əməliyyatların böyük hissəsi regionlarda aparılır. Əvəzində mənzillərin özəlləşdirilməsi və qeyri-yaşayış sahələrinin qeydiyyatının əsas hissəsi Bakının payına düşür.

Yanvar-oktyabr aylarında Bakı şəhər Ərazi İdarəsi üzrə daşınmaz əmlakın qeydiyyatı 2010-cu ilə nisbətən 35,0% artdığı halda, regionlarda artım sürəti 68%-i keçib.

Ümumilikdə ilk 10 ayda Xidmətin 18 ərazi idarəsinin hamısında daşınmaz əmlakın qeydiyyatı artıb. Ən çox artım Beyləqan (2,3 dəfə), Şamaxı (2,15 dəfə), Qəbələ (2,13 dəfə) və Abşeron ərazi idarələrində (təqribən 2 dəfə) qeydə alınıb.