İnfrastruktur

Ana səhifə

İnfrastruktur

Bu ilin ilk 8 ayında Azərbaycanda 98 minə yaxın əmlak qeydiyyata alınıb

13 sentyabr 2012 15:03 (UTC +04:00)

Bakı. Əli Əhmədov - APA-Economics. Aparılan maarifləndirmə və məlumatlandırma tədbirlərinin nəticəsi olaraq əhalinin daşınmaz əmlaklarının dövlət qeydiyyatına alınması və daşınmaz əmlakla bağlı digər əməliyyatların aparılması məqsədilə Əmlak Məsələləri Dövlət Komitəsinin (ƏMDK) yerli qeydiyyat orqanlarına müraciətləri artıb.

ƏMDK-dan «APA-Economics»ə verilən məlumata görə, 2012-ci ilin yanvar-avqust aylarında ölkədə 98 minə yaxın əmlaka aid hüquqlar dövlət qeydiyyatına alınıb. Qeydiyyatdan keçən əmlakların 28 mini ilkin, 70 mini isə təkrar qeydiyyata aiddir.

Bu ilin yanvar-avqust ayları ərzində respublika üzrə aparılmış ümumi qeydiyyatın 37 mini (37,4%) Bakı şəhərinin payına düşüb. Bundan başqa, 92 minə yaxın daşınmaz əmlakın texniki inventarlaşdırılması aparılıb və texniki pasport tərtib edilib. Bu müddət ərzində hüquqi və fiziki şəxslərə dövlət reyestrindən 71 minə yaxın məhdudiyyət arayışı verilib.

Cari ilin yanvar-avqust ayları ərzində tərtib edilmiş texniki pasportlardan 33 minə yaxını (35,7%), dövlət reyestrindən hüquq sahiblərinə verilmiş məhdudiyyət arayışlarından 27 minə yaxını (37,6 %) Bakı şəhərinin payına düşür.

Bunlarla yanaşı, daşınmaz əmlakın elektron qeydiyyatı üçün ən vacib şərtlərdən biri qeydiyyat məlumatlarının elektron arxivin və məlumat bazasının yaradılması istiqamətində işlər aparılır. Səmərəli, şəffaf və çevik fəaliyyət üçün uzun illər ərzində arxivlərdə toplanmış kağız daşıyıcılarında olan qeydiyyat məlumatları hazırda elektron bazaya köçürülür. Belə ki, “Daşınmaz Əmlakın Qeydiyyatı Layihəsi” çərçivəsində 700 mindən çox əmlaka dair kağız daşıyıcısında olan qeydiyyat məlumatlarının elektron bazaya köçürülməsi təmin edilir.

Elektron arxivlərin yaradılması və qeydiyyat sənədlərinin elektron formata köçürülməsi nəticəsində daşınmaz əmlakın qeydiyyatı ilə bağlı xidmətlərin göstərilməsində vaxt itkisinin aradan qaldırılmasına, operativliyin dəfələrlə artırılmasına imkanlar yaranır.