İnfrastruktur

Ana səhifə

İnfrastruktur

Bakı Metropolitenində daha bir stansiyanın altından tunel qazılacaq

26 sentyabr 2012 12:09 (UTC +04:00)

Bakı. Nicat Mustafayev – APA-Economics. Bakı Metropoliteni daha bir stansiyanın altından tunel qazıntısına hazırlığı başa çatdırır.
Metropolitendən «APA-Economics»ə verilən məlumata görə, Yaşıl xəttin «Memar Əcəmi» stansiyasının altından keçən tunelin qazıntısı böyük maraqla qarşılanıb: «Həm ona görə ki, Bakıda metro tikintisində ilk dəfə idi bir stansiyanın altından tunel inşa olunurdu. Digər səbəb isə həmin stansiyanın daxil olduğu sahənin fəaliyyətinin dayandırılması idi».
Metropolitendən həmçinin bildirilib ki, metro xətlərinin bir-biri ilə kəsişməsi dünya təcrübəsində nadir hadisə deyil. Bu, yeraltı yolların fəaliyyətinin səmərəliliyi, effektivliyi üçün vacibdir. Paytaxtda mövcud iki metro xətti də kəsişir. Lakin onlar eyni müstəvidə olduğundan problemləri də kifayət qədərdir və hazırda metropoliten rəhbərliyi yaranmış maneələrin aradan qaldırılması istiqamətində gərgin iş aparır: «Yeni xətlər də daxil olmaqla, belə kəsişmə nöqtələrinin sayı çox olacaq. Bu isə şəhərin bir hissəsindən digərinə hərəkət edərkən marşrut rahatlığını təmin edəcək. Elə mövcud xətlərdə də təkcə «28 May» və «Cəfər Cabbarlı» stansiyalarında keçid təşkil edilməyəcək. Növbəti belə məntəqə «Həzi Aslanov» stansiyasıdır».

Metropolitenin məlumatına əsasən, Yaşıl xəttin inşasına artıq başlanıb və şərti adı «Həzi Aslanov-2» olan stansiyasının tunelləri «Həzi Aslanov» stansiyasının altından keçəcək. Avadanlığın işə başlayacağı sahədə sipəraltı dəmir-beton əsasın layihəyə uyğun qoyulması da başa çatdırılıb, 22 metrlik kvadrat sipər kamerası tam hazırdır: «Artıq stansiyanın inşası üçün lazım olan sipər kamerasında qazma avadanlığının quraşdırılmasına başlanılıb».

Qeyd edək ki, «Memar Əcəmi» stansiyasının altından keçən Bənövşəyi xəttin tunelindən fərqli olaraq, burada qazma köhnə mexaniki üsulla aparılacaq. İki həftəyə qədər vaxt aparan bu işin böyük hissəsi artıq görülüb. Qazma avadanlığı yığıldıqdan sonra stansiyanın altından tunel qazıntısına başlanılacaq.

Eyni zamanda? mövcud stansiyanın altından sağ yolun üfüqi oxu boyunca sementlə bərkitmə işləri də aparılıb. Diametri 219 sm, hər birinin uzunluğu 54 metr olan 27 metal boru stansiyanın altından keçirilməklə qazma sahəsinin çevrəsi boyunca vurulub. Bu üsul qrunt axıntılarının qarşısını almaqla yanaşı, təhlükəsizlik tədbirlərinin gücləndirilməsi baxımından da əhəmiyyətlidir. Qazma prosesi başlayarkən digər texniki tələblər və təhlükəsizlik məsələləri də, layihəyə və tikinti şərtlərinə uyğun həllini tapacaq. Stansiyanın fəaliyyəti ilə bağlı qərar da həmin vaxt veriləcək.