İnfrastruktur

Ana səhifə

İnfrastruktur

Azərbaycanda 674 milli standart və 20878 dövlətlərarası standart qüvvədədir - FOTO

Azərbaycanda 674 milli standart və 20878 dövlətlərarası standart qüvvədədir - <font color=red>FOTO</font>

12 oktyabr 2012 15:16 (UTC +04:00)

Bakı. Elnur Hüseynquluyev – APA-Economics. 14 oktyabr Ümumdünya Standartlaşdırma Günü kimi qeyd olunur.

Azərbaycan Standartlaşdırma, Metrologiya və Patent üzrə Dövlət Komitəsindən «APA-Economics»ə verilən məlumata görə, 14 oktyabr 1946-cı ildə 25 ölkənin nümayəndələri standartlaşdırma üzrə milli qurumların fəaliyyət güclərinin birləşdirilməsi və işlərinin koordinasiyasını həyata keçirmək üçün yeni təşkilatın yaradılması məqsədilə Böyük Britaniyanın London şəhərində toplaşıb. Beynəlxalq Standartlaşdırma Təşkilatı (İSO) isə rəsmi olaraq bir il sonra fəaliyyətə başlayıb.

Bu günün standartlaşdırma günü kimi qeyd edilməsi İSO-nun prezidenti Faruk Sunterin (Türkiyə) təşəbbüsü ilə 1970-ci ildən qərara alınıb. Həmin dövrdən bu gün bütün standartlaşdırma üzrə digər qlobal təşkilatlar tərəfindən də qeyd edilir.

Hazırda Azərbaycanda standartlaşdırmanın inkişaf etdirilməsi, beynəlxalq standartlarla harmonizasiya, beynəlxalq tələblərə cavab verən yeni milli standartların yaradılması və standartlar fondunun genişləndirilməsi, təkmilləşdirilməsi əsas məqsədlərdəndir. Azərbaycanda keyfiyyət infrastrukturunun inkişafı və tənzimlənməsi standartlaşdırma, akkreditasiya, sertifikatlaşdırma, metrologiya, uyğunluğun qiymətləndirilməsi fəaliyyət istiqamətləri vasitəsilə həyata keçirilir.

Ölkədə standartlaşdırmanın inkişaf etdirilməsi və bu istiqamətdə beynəlxalq təcrübənin öyrənilməsi, tətbiq edilməsi istiqamətində Komitə İSO, İEC, CEN, CENELEC, MDB üzrə Dövlətlərarası Şura (MQS), Codex Alimentarius Komissiyası və s. bu kimi regional və beynəlxalq təşkilatlarla sıx əməkdaşlıq edir. Azərbaycan bu təşkilatlarda həm müşahidəçi, tərəfdaş üzv kimi, həm də tam üzv kimi çıxış edir.

Standartlaşdırma sahəsində 2012-ci il ərzində İsrail, Litva, Yunanıstan, Gürcüstan, Misir, Makedoniya ilə beynəlxalq əməkdaşlıq əlaqələri qurulub, müvafiq tədbirlər həyata keçirilib və gələcəkdə iki tərəfli əməkdaşlıq istiqamətində sazişlərin imzalanması üzərində işlər aparılır. Hazırda ABŞ-ın standartlaşdırma üzrə nüfuzlu təşkilatı Sınaqlar və Materiallar üzrə Amerika Cəmiyyəti (ASTM) ilə ikitərəfli əməkdaşlıq memorandumunun imzalanması istiqamətində işlər aparılır.

Komitədən bildirilib ki, bu il nəqliyyat vasitələrində sürücülərin və sərnişinlərin təhlükəsizliyinin təmin edilməsi istiqamətində BMT-nin Avropa İqtisadi Komissiyasının qaydaları əsasında ekoloji normaları təyin edən 80-dən çox milli standart layihəsi müvafiq orqanların rəy və təklifləri nəzərə alınmaqla hazırlanıb və dövlət qeydiyyatına alınıb. Ümumilikdə il ərzində 139 yeni milli standart dövlət qeydiyyatına alınıb. Müqayisə üçün qeyd edək ki, keçən il bu rəqəm 41 olub. Hazırda cəmi 674 milli standart və 20878 dövlətlərarası standart (QOST) Azərbaycanda qüvvədədir. Həmçinin il ərzində respublika üzrə avtomobil yollarının, piyada keçidlərinin, körpülərin inşası üzrə Komitəyə təqdim edilmiş 18 layihəyə baxılıb və müvafiq rəylər verilib.