İnfrastruktur

Ana səhifə

İnfrastruktur

Azərbaycan Rabitə və İnformasiya Texnologiyaları Nazirliyi korrupsiyaya ilə mübarizə və «Açıq Hökumət»in təşviqinə dair tədbirlər planı hazırlayıb

22 oktyabr 2012 09:43 (UTC +04:00)

Bakı. Nicat Mustafayev – APA-Economics. Azərbaycan Rabitə və İnformasiya Texnologiyaları Nazirliyində korrupsiyaya qarşı mübarizə və «Açıq Hökumət»in təşviqinə dair tədbirlər planı hazırlanıb.

Nazirlikdən «APA-Economics»ə verilən məlumata görə, rabitə və informasiya texnologiyaları naziri Əli Abbasov Azərbaycan prezidentinin 2012-ci il 5 sentyabr tarixli sərəncamı ilə təsdiq edilmiş «Açıq Hökumətin təşviqinə dair 2012-2015-ci illər üçün Milli Fəaliyyət Planı» və «Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı»nın icrasını təmin etmək üçün yeni əmr imzalayıb.

Əmrə əsasən, sözügedən hər iki fəaliyyət planlarının «Rabitə və İnformasiya Texnologiyaları Nazirliyinə bilavasitə aid bəndlərinin icrasına dair 2012-2013-cü illərdə icrasına dair İş Planı» təsdiqlənib. Həmçinin, RİTN-in şöbələrinə, birlik və müəssisələrinə İş Planında nəzərdə tutulmuş bəndlərin vaxtında icra olunmasını təmin etmək tapşırılıb.

Nazirliyin 2012-2013-cü illər üzrə İş Planına gəlincə, «Açıq Hökumətin təşviqinə dair 2012-2015-ci illər üçün Milli Fəaliyyət Planı»na uyğun olaraq informasiya əldə edilməsi asanlaşdırılmalıdır. Bu məqsədlə 2012-2014-cü illər ərzində dövlət qurumlarında informasiya azadlığı üzrə məsul şəxslərin müəyyən edilməsi, informasiya azadlığı ilə bağlı daxili icraat qaydalarının qəbul edilməsi və bu barədə ictimaiyyətin məlumatlandırılması həyata keçiriləcək.

Dövlət qurumlarında informasiya azadlığı üzrə məsul şəxslərin müəyyən edilməsi isə bu il ərzində tamamlanmalıdır. 2012-2013-cü illərdə informasiya azadlığı ilə bağlı daxili icraat qaydalarının hazırlanması və təsdiq edilməsi, gələn il ictimaiyyətin məlumatlandırılması, 2012-2014-cü illərdə informasiya azadlığının təmin edilməsi məqsədi ilə məsul dövlət qulluqçuları üçün ətraflı treninqlərin keçirilməsi, gələn il Nazirliyin məsul dövlət qulluqçuları üçün informasiya azadlığı ilə bağlı treninqlərin keçirilməsi nəzərdə tutulur.

Bundan başqa, sözügedən sahədə Milli Fəaliyyət Planı dövlət orqanlarının öz fəaliyyəti barədə ictimaiyyətə müntəzəm məlumat verməsini də əks etdirir. Bu məqsədlə nəzərdə tutulan işlər sırasında dövlət orqanlarının öz fəaliyyəti barədə məlumatları mütəmadi, yenilənmiş əsaslarla internet səhifələrində yerləşdirməsi, həmçinin Nazirliyin fəaliyyəti barədə məlumatları mütəmadi, yenilənmiş əsaslarla internet səhifələrində yerləşdirməsi kimi tədbirlər yer alıb.

Eyni zamanda, 2012-2015-ci illər ərzində dövlət orqanlarının öz fəaliyyəti barədə illik məruzələr tərtib etməsi və internet səhifələrində açıqlaması, ildə bir dəfə RİTN-in fəaliyyəti barədə illik hesabatların hazırlanması və Nazirliyin rəsmi internet saytında yerləşdirilməsi, 2012-2015-ci illərdə dövlət orqanlarının öz fəaliyyəti barədə mətbuat konfransları və ictimaiyyətlə birbaşa ünsiyyət formasında tədbirlər keçirməsi, rübdə bir dəfə Nazirliyin fəaliyyəti barədə mətbuat konfransları və ictimaiyyətlə birbaşa ünsiyyət formasında tədbirlər keçirməsi, mütəmadi olaraq «Elektron hökumət» portalında ictimai əhəmiyyət kəsb edən qanun layihələrinin hazırlanması prosesinə vətəndaş cəmiyyəti nümayəndələrinin cəlb edilməsi, ictimai dinləmələrin keçirilməsi, elektron xidmətlər göstərilməsi üzrə qiymətləndirmənin həyata keçirilməsi və ictimaiyyətə açıqlanması, ildə bir dəfə Nazirlik tərəfindən təqdim edilən «e-xidmətlər» barədə ictimai təqdimatların keçirilməsi, «Açıq Hökumət Tərəfdaşlığı» çərçivəsində öhdəliklərin icrası istiqamətində zəruri tədbirlərin davam etdirilməsi, Nazirliyə aid öhdəliklərin icrası istiqamətində zəruri tədbirlərin görülməsi və s. kimi tədbirlər nəzərdə tutulub.

«Korrupsiyaya qarşı mübarizəyə dair 2012-2015-ci illər üçün Milli Fəaliyyət Planı»na uyğun olaraq isə 2012-2015-ci illərdə dövlət qurumlarının rəhbərləri tərəfindən mütəmadi olaraq vətəndaşların birbaşa, o cümlədən səyyar qəbulunun təşkili, qrafik üzrə Nazirliyin rəhbərliyi tərəfindən vətəndaşların qəbulu, 2013-2014-cü illərdə ərizə və şikayətlərin elektron qaydada qəbulu və rəsmi cavablandırılması işinin təkmilləşdirilməsi, cari il ərzində RİTN-in rəsmi saytında ərizə və şikayətlərin elektron qaydada qəbulu və rəsmi cavablandırılmasının təşkili həyata keçirilməlidir.

Bundan başqa, Azərbaycan Respublikasının Baş Prokuroru yanında Korrupsiyaya qarşı Mübarizə İdarəsinin fəaliyyətinin təkmilləşdirilməsi istiqamətində 2013-cü ildə İdarənin dövlət orqanlarının informasiya sistemləri, məlumat bazaları və reyestrlərindən qanunvericiliklə müəyyən edilmiş qaydada, real vaxt rejimində istifadəsinin təmin edilməsi üzrə tədbirlər görülməsi, Nazirliyin məlumat bazaları və reyestrlərindən qanunvericiliklə müəyyən edilmiş qaydada informasiyanın real vaxt rejimində istifadəsinin təmin edilməsi, maraqlar toqquşmasının qarşısının alınması və maliyyə xarakterli məlumatlar haqqında bəyannamələrin təqdim edilməsi istiqamətində 2013-2015-ci illər ərzində maraqlar toqquşmasının qarşısının alınması üzrə treninqlərin təşkili və s. nəzərdə tutulur.