İnfrastruktur

Ana səhifə

İnfrastruktur

“Caspian European Club”un İdarə Heyətinin yeni tərkibdə ilk toplantısı keçirilib

13 dekabr 2017 14:36 (UTC +04:00)

Bakıda “Caspian European Club”un İdarə Heyətinin yeni tərkibdə ilk toplantısı təşkil edilib.

Bu barədə “APA-Economics”ə “Caspian European Club”dan məlumat verilib. İclasda “Caspian European Club” və “Caspian American Club”un sədrinin birinci müavini Telman Əliyev “Caspian European Club”un yeni baş icraçı direktoru Mustafa Abbasbəylini təqdim edib.

İclasa sədrlik edən Mustafa Abbasbəyli öz növbəsində “Caspian European Club”un İdarə Heyətinin yeni üzvlərini seçilmələri münasibətilə təbrik edib və onlara klubdakı gələcək fəaliyyətlərində uğurlar arzulayıb.

Qeyd edək ki, İdarə heyətinə seçkilər noyabrın 15-də “Caspian Energy Forum”un səhiyyəyə həsr olunmuş xüsusi sessiyasında (Caspian Energy Medical Forum) keçirilib. Səsvermə hüququna yalnız “Caspian European Club”un üzvləri sahib olublar. 50-dən artıq səs toplamış hər bir namizəd “Caspian European Club”un İdarə Heyətinin tərkibinə daxil olmaq imkanı əldə edib.

Toplantı zamanı Mustafa Abbasbəyli 2018-ci ilin sonuna kimi həyata keçirilməsi vacib olan prioritetlərdən, yeni layihələrdən və qarşıya qoyulmuş vəzifələrdən danışıb.

İclasda Caspian European Club-a daxil olmağın yenilənmiş şərtləri diqqətə çatdırılıb, komitədəki sahə klublarının təzə adları açıqlanıb, yeni komitə rəhbərləri təyin edilib, həmçinin klubun idarə heyətinin nizamnaməsi təsdiqlənib. “İşçi komitə rəhbərlərinin sədrliyi ilə ayda iki dəfə dəyirmi masa formatında Klubun iclası keçiriləcək. Bu görüşlər çərçivəsində idarə heyətinin üzvləri sözügedən sahələrin şirkətlərinin üzləşdikləri problemlər və onların mümkün həlli yolları barədə danışacaqlar”, - deyə “Caspian European Club”un baş icraçı direktoru məlumat verib.

“Bu il dekabrın 15-də Azərbaycan Respublikasının Gürcüstandakı fövqəladə və səlahiyyətli səfiri Dursun Həsənovun iştirakı ilə birinci Azərbaycan-Gürcüstan biznes-forumu təşkil olunacaq. Eyni zamanda dekabrın 20-də ABŞ-ın Azərbaycan Respublikasındakı fövqəladə və səlahiyyətli səfiri Robert Sekutanın iştirakı ilə 9-cu CEO Lunch Baku keçiriləcək”, – deyə Mustafa Abbasbəyli əlavə edib.

“Caspian European Club” 2002-ci ilin iyununda Xəzər-Qara dəniz regionunda fəaliyyət göstərən nəhəng neft-qaz şirkətlərinin dəstəyi ilə yaradılıb. “Caspian European Club” və “Caspian American Club”un sədri Azərbaycan prezidenti İlham Əliyevdir.

Yarandığı ilk gündən “Caspian European Club” neft sahəsindən əldə olunan gəlirlərin qeyri-neft sektorunun inkişafına yönəldilməsinə imkan yaradır. Sıralarında 5 mindən artıq şirkət və təşkilatı birləşdirən “Caspian European Club” dünyanın 50 ölkəsində fəaliyyət göstərir, dövlət qurumları ilə özəl sektor arasında dialoqun dəstəklənməsi istiqamətində fəal iş aparır.